ރަސްމީ ދަތުރުފުޅެއްގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، މިރޭ ޔޫއޭއީ އަށް ފުރާވަޑައިގަންނަވާނެއެވެ.
ސަރުކާރުގެ އިސްބޭފުޅުންތަކެއްވެސް ބައިވެރިވެވަޑައިގަންނަވާ މި ދަތުރުފުޅަކީ ޔޫއޭއީގެ ރައީސް ޚަލީފާ ބިން ޒައިދު އަލް ނަހްޔާންގެ ދައުވަތަކަށް ކުރައްވާ ދަތުރުފުޅެކެވެ. މިދަތުރުފުޅުގައި އެނާޖީ ސަމިޓްގައި ރައީސް ޞާލިޙް ބައިވެރިވެވަޑައިގަތުމުގެ އިތުރުން ދެ ގައުމުގެ ގުޅުން ބަދަހިކުރުމާ ގުޅޭ ރަސްމީ ވާހަކަތައް އޮންނާނެ ކަމަށްމައުލޫމާތުލިބިފައިވެއެވެ.
ރައީސް ޞާލިޙް ހުވާކުރެއްވުމުގެ ރަސްމިއްޔާތަށް ޚާއްސަ މަންދޫބެއްގެ ގޮތުގައި ޔޫއޭއީން ވަނީ އެގައުމުގެ ރައީސްގެ ދަރިކަލުން ފޮނުވާފަައެވެ.
ދާދިފަހުން ފޮރިން މިނިސްޓަރ އަބްދުﷲ ޝާހިދާއި ޓްރާންސްޕޯޓް މިނިސްޓަރު އައިޝަތު ނަހުލާ ވެސް ވަނީ ރަސްމީދަތުރުފުޅެއްގައި ޔޫއޭއީ އަށް ވަޑައިގެންފައެވެ.
ދިވެހިންނަށް ވިސާއާ ނުލައި ޔޫއޭއީ އަށް ދަތުރުކުރެވޭނެ އިންތިޒާމް މިހާރު ވަނީ ހަމަޖައްސައިދީފައެވެ.
