މިއަދު ހުޅުމާލޭގައި ހުޅުވި ހުރަވީ ސްކޫލުގައި ކިޔަވައިދޭނީ %100 ދިވަހި ޓީޗަރުންކަމަށާއި މިއަހަރު ރާއްޖޭގެ ސްކޫލްތަކުގައި ކިޔަވައިދޭ ދިވެހި ޓީޗަރުންގެ ނިޞްބަތް މިދިއަ އަހަރު ވަނީ %2 އިތުރުވެ ބިދޭސީ ޓީޗަރުންގެ ނިޞްބަތް ވަނީ %16 އަށް މަދުވެފައި ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ހުރަވީ ސްކޫލް ހުޅުވުމަށް މިއަދު އެ ސްކޫލުގައި ބޭއްވި ރަސްމިއްޔާތުގައި ރައީސް އިބްރާހީމް މުޙައްމަދު ޞާލިޙް ވިދާޅުވީ ޖަޒީރާ ސްކޫލުގެ ނިޒާމަށް ސްކޫލްތައް ހިންގުމަށްޓަކައި ބިދޭސީ ޓީޗަރުން މަދުކޮށް ދިވެހި ޓީޗަރުން އިތުރުކުރުމަކީ ސަރުކާރުގެ ވަރަށް މުހިންމު އަމާޒެއް ކަމަށެވެ. އަދި މިއަހަރު ކިޔަވައިދޭ ޓީޗަރުންގެ އަދަދު 9800 އަށްވުރެ އިތުރުވެގެންދާއިރު މި ތަފާތު އިތުރަށް ބޮޑުވެ ދިވެހި ޓީޗަރުންގެ އަދަދު އިތުރުވެގެންދާނެ ކަމަށެވެ.
ރައީސް އިބްރާހީމް މުޙައްމަދު ޞާލިޙް ވިދާޅުވީ ހަމަ އެއާއެކު މިއަހަރު ޤައުމީ ޔުނިވަރސިޓީން ދަސްވެނިވާ 600 އަށްވުރެ ގިނަ ދިވަހި ޓީޗަރުންނާއިއެކު ތައުލީމީ ދާއިރާގައި ދިވެހި ޓީޗަރުންގެ ހިއްޞާ އިތުރުވެގެންދާނެ ކަމަށެވެ. އަދި މިއީ ޒުވާނުންނަށް ވަޒީފާ ލިބުމުގައިވެސް އިތުރު ކުރިއެރުންތަކެއް ލިބިގެންދާނެ ކަމެއް ކަމަށެވެ.
ރައީސް އިބްރާހީމް މުޙައްމަދު ޞާލިޙް ވިދާޅުވީ ރާއްޖޭގެ ތަރައްޤީއަށްޓަކައި މިއަދު ކުރަންޖެހިފައިވާ އެންމެ މުހިންމު އެއް މަސައްކަތަކީ މީހުން ބިނާކުރުމާ އިންސާނީ ވަސީލަތްތައް އިތުރުކޮށް ތަރައްޤީ ކުރުމެވެ. "މިސަރުކާރުން ރާއްޖޭގެ ތަރައްޤީއަށް ކުރާނެ އެންމެ ބޮޑު، އެންމެ މުހިންމު މަސައްކަތަކީވެސް މިއީ."
