ގޭންގްތަކާއި ފަނޑިޔާރުންނާ ގުޅުން އޮތްތޯ ބެލުމަށް ޖުޑިޝަލް ސާވިސް ކޮމިޝަން (ޖޭއެސްސީ) އިން ކުރިއަށް ގެންދާ ތަހުގީގަށް އެހީތެރިކަން ދެއްވާނެ ކަމަށް، ގޮތް ނޭނގޭ މަރުތަކާއި ގެއްލުވާލާފައިވާ މީހުންގެ މައްސަލަތައް ބެލުމަށް ރައީސް އެކުލަވާލެއްވި ރިޔާސީ ކޮމިޝަންގެ ރައީސް ހުސްނުއްސުއޫދު ވިދާޅުވެއްޖެއެވެ.
ސުއޫދު މިއަދު ކުރެއްވި ޓްވީޓެއްގައި ވިދާޅުވީ ގޭންގްތަކާއި ކޮޓުތަކާ ގުޅުންއޮތްތޯ ބެލުމަށްޓަކައި ހުޅުވާލެވިފައިވާ ތަހުގީގެއް ހިންގުމަށް ޖޭއެސްސީން ނިންމި ނިންމުމަށް މަރުހަބާ ކިޔާ ކަމަށާއި ޖުޑިޝަރީ އިސްލާހުކުރެވޭނީ އެފަދަ ފިޔަވަޅުތައް އަޅައިގެން ކަމަށެވެ. އަދި އެކަމުގައި އޭނާގެ އެހީތެރިކަން ދެއްވާނެ ކަމަށް ސުއޫދު ވިދާޅުވިއެވެ.
މިދިޔަ މަހު ސުއޫދު ބޭއްވި ނޫސްވެރިންގެ ބައްދަލުވުމެއްގައި ވަނީ ގޭންގްތަކާއި ބައެއް ފަނޑިޔާރުންނާ ގުޅުން އޮތް ކަމަށް ތުހުމަތު ކުރައްވައިފައެވެ.
ސުއޫދު ކުރެއްވި ތުހުމަތުތައް ބެލުމަށް ޖޭއެސްސީން އެކުލަވާލި ކޮމެޓީގެ ރައީސަކަށް ހަމަޖައްސާފައި ވަނީ ބަންޑާރަ ނައިބު އިބްރާހިމް ރިފްއަތު އެވެ.
