ގެއްލުވާލާފައިވާ މިނިވަން ނޫޙުގެ ނޫސްވެރިޔާ އަހުމަދު ރިލްވާން އަބްދުﷲ ގެ މައްސަލައިގައި އުފެދުނު ސުވާލުތަކަށް ޖަވާބު ހޯދޭނެކަމުގެ ޔަގީންކަން އޮތްކަމަށް ހުސްނުއް ސުއޫދު ވިދާޅުވެއްޖެއެވެ.
ރައީސް އިބްރާހިމް މުޙައްމަދު ޞާލިޙު އުފެއްދެވި، އާދަޔާ ޚިލާފު ގޮތްގޮތަށް މަރާލާފައިވާ މީހުންނާއި ވީނުވީއެއް ނޭނގި ގެއްލިފައި ނުވަތަ ގެއްލުވާލާފައިވާ މީހުންގެ މައްސަލަތައް ބަލާ ކޮމިޝަންގެ ރައީސް ހުސްނުއްސުއޫދު އިއްޔެ ކުރެއްވި ޓްވީޓެއްގައި ވިދާޅުވެފައިވަނީ އެމަސައްކަތްތަކާއިމެދު ވަރަށް ބޮޑަށް އުފާވާ ކަމަށާއި 2014 ވަނަ އަހަރުގެ އޮގަސްޓު މަހުގެ ނުވަވަނަ ދުވަހު އުފުލި އަޑުތަކާއި ކުރެއްވި ސުވާލުތަކަށް ޖަވާލު ލިބޭނެ ކަމުގެ ޔަގީންކަން އޮތް ކަމަށެެވެ.
ރިލްވާން ގެއްލުވާލި މައްސަލައިގައި އޭނާ ހޯދުމަށް އަޑު އުފުލާ، އެދުވަހު ބޭއްވި ހިނގާލުމުގައި ސުއޫދު ވެސް ވަނީ ބައިވެރިވެ ވަޑައިެގންފައެވެ.
ވަރަށް ފަހުން ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ސުއޫދު ވިދާޅުވީ، ރިލްވާނު ގެއްލުވާލި މައްސަލައާއި މަޝްހޫރު ދީނީ ޢިލްމުވެރިޔާ އަލްމަރްޙޫމް ޑރ. އަފްރާޝީމް އަލީގެ މަރުގެ މައްސަލައާއި އަދި މަރާލި ބްލޮގަރ ޔާމީން ރަޝީދުގެ މަރުގެ މައްސަލައިގައި ގުޅުމެއްވާ ކަމަށެވެ.
މީގެއިތުރުން، ރިލްވާންގެ މައްސަލައިގައި ދުވަސްވެ، ކުރިން ނުބެލިހުރި އައު ކަންތައްތަކެއް ބަލަން ފެށިފައި އެބަހުރި ކަމަށާއި އެގޮތުން ކުރިން ނުބެލޭ މައުލޫމާތުތަކަށް މިހާރު ވާސިލުވެފައި އެބަހުރި ކަމަށް ސުއޫދު ވިދާޅުވެފައިވެއެވެ. އަދި އެކަންކަން ފުލުހުން ރަނގަޅަށް ހިއްސާ ކޮށްފައިވާ ކަމަށްވެސް ވިދާޅުވެފައިވެއެވެ.
ބައެއް ބާރުތައް އެކޮމިޝަނަށް ނުލިބި ހުރުމުން، ފުރިހަމަ ތަހުގީގެއް ހެދުމުގައި އަދިވެސް ގޮން ޖެހުންތަކެއް ހުރި ކަމުގައިވީ ނަމަވެސް، މިއަހަރުގެ އޭޕްރިލް މަހުގެ ނިޔަލަށް ހުރިހާ މައްސަލައެއް ވެސް ތަހުގީގުކޮށް ނިންމާނެ ކަމަށް ހުސްނުއްސުއޫދު ވިދާޅުވެފައިވެއެވެ.
