މީހުން އެދޭ ހުރިހާ ކަމެއް ވަގުތުން ނުވުމަކީ ﷲ ތަޢާލާ ކަނޑައަޅުއްވަވާފައިވާ ނިޒާމެކެވެ. އޮތީ ކެތްތެރިވާން ދަސްކުރުމެވެ. ކެތްތެރިވާން ދަސްކުރުމަކީ ކޮންމެ މީހަކުވެސް ދަސްކުރަންޖެހިފައިވާ ފިލާވަޅެކެވެ. އެ ފިލާވަޅު ދަސްކުރުމުގައި ގިނަ ބައަކު މިދަނީ ފޭލްވަމުންނެވެ.
ކެތްތެރިވުމަކީ ނުވަތަ ކެތްތެރި ކަމަކީ އިންސާނުންގެ ކިބައިގައި ކޮންމެހެން ހުންނަޖެހޭ ސިފައެކެވެ. ﷲ ތައާލާ ތިމަން ﷲ ވޮޑިގެންވަނީ ކެތްތެރިންނާއި އެކުގައިކަމަށް ވަޙީ ކުރައްވަވާފައި އޮތުމުން ކެތްތެރިކަމުގެ މަތިވެރިކަން ވަރަށް ރަނގަޅަށް އެނގިގެން ދެއެވެ. ކަމެއްގައި ކެތްތެރިވާން ޖެހިފައިވާނަމަ ފުރަތަމަ ވެސް ޔަޤީންކުރަންވީ ﷲ ތަޢާލާ ތިމާ އާއިއެކު ވޮޑިގެންވާ ކަމެވެ. އެއިރުން ހުރިހާ ހާސްކަމަކާއި ނުތަނަވަސްކަން ފިލައިގެންދާނެއެވެ.
ކަންކަމަށް އެދި މަސައްކަތް ކުރުމުން އެކަމެއް ޙާޞިލު ނުވެ ދުވަސްތައް ދިގުލައި ދެއެވެ. އަދި ބައެއް މީހުންނަށް އެކަމެއް ޙާޞިލު ނުކުރެވި އުޅެނިކޮށް ދުނިޔެ ދޫކުރަންވެސް ޖެހިފައި އެބަހުއްޓެވެ.
އެއީވެސް ކަންބޮޑުވާން ޖެހެންވީ ކަމެއް ނޫނެވެ. އަހަރެމެން ކަމަކަށް ކިތަންމެ ބޭނުންވި ނަމަވެސް އެ ކަމެއް ވުން ނުވަތަ ޙާޞިލުވާން އެންމެ ރަނގަޅު ވަގުތު ދެނެވޮޑިގެންވަނީ ހަމަ ﷲ ތަޢާލާއެވެ. އަދި އެކަމެއް ވުމުން ލިބޭނީ ގެއްލުންކަން ނުވަތަ ފައިދާކަންވެސް ދެނެވޮޑިގެންވަނީ ހަމަ ﷲ ތަޢާލާއެވެ. މިކަމުގެ ވަރަށް އާދައިގެ މިސާލެއް ބުނެފާނަމެވެ.
ފްލައިޓަކުން ފުރަން އުޅުނު މީހަކަށް އެމީހާ ދަތުރުކުރަން ބޭނުންވި ފްލައިޓުން ޖާގަ ނުލިބިދާނެއެވެ. އަދި ފުރަން ދިއަ ތަނާ ކޮންމެވެސް ކަމެއް ދިމާވެގެން ނުފުރިވެސް ހިނގައިދާނެއެވެ! އެކަމާއިމެދު އިންތިހާއަށް އެބަ ދެރަވަމުއެވެ. ކަންބޮޑުވަމުއެވެ. ތިމާ ދަތުރުކުރަން ބޭނުންވި އެ ފްލައިޓް މަތީގައި އޮއްވާ އެބަ ގޮވައެވެ. އެންމެން އެބަ މަރުވެސް ވެއެވެ.
އެ ފްލައިޓުން ދަތުރު ނުކުރެވުނުކަން އެއީ މިންވަރު ކުރެއްވެވި ކިހައި ބޮޑު ނިޢްމަތެއްކަން އިޙްޞާޞް ކުރެވެނީ އެ ހިސާބުންނެވެ. ބައެއް މީހުން މީހަކު ދެކެ ލޯބިވެ ވަރަށް އަވަހަށް ކައިވެނިކުރަން ބޭނުންވެދާނެއެވެ. ކައިވެނި ނުކުރެވި ލަސްވަމުން ދަނިކޮށް އޭނާ އާއި ކައިވެނިކުރުމުގެ ފުރުޞަތު ވެސް އެބަ ގެއްލެއެވެ. އެފަދަ ކަމެއް މެދުވެރިވުމުން ވަރަށް ދެރަވެ ހިތާމަވެސް ކުރެވެއެވެ.
އެއީ ތިމާއަށް ރަނގަޅަކަށް މެދުވެރިވި ކަމެއްކަން އެނގެނީ ފަހުން ލިބޭ ބައިވެރިޔާއަކީ މާ ފުރިހަމަ ބައިވެރިއަކަށްވުމުންނެވެ. ވީމާ ތިމާ އެދޭ ކަމެއް އެދޭ ވަގުތު ޙާޞިލު ނުވުމުން ނުވަތަ ޙާޞިލުވުން ލަސްވުމުން މާޔޫސް ނުވާށެވެ! ލަސްވަނީ ތިމާއަށް ލިބެން އޮތް ނިޢްމަތް ބޮޑުވުމުންކަން ޔަޤީންކުރާށެވެ!
ﷲ ތަޢާލާއަށް ދުއާ ކުރުންމަތީގައި ސާބިތުވެ ހުންނާށެވެ! އަހަރެމެން އިޚްލާޞްތެރިކަމާއިއެކު ކުރާ ކޮންމެ ދުޢާއެއްގެ އަޑު ﷲ ތަޢާލާ ހަމަ އެންމެ މޮޅަށް އައްސަވައި ވޮޑިގެންވެއެވެ. ކަންބޮޑުވެ މާޔޫސްވެ ބަލިތައް ޖެހި ބޭސްކާން ޖެހެނީ މިކަންކަން ޤަބޫލު ނުކުރެވޭތީއެވެ.
