ޓެކްސީ ޑްރައިވަރުން އަދި ޓެކްސީ ސެންޓަރުތައް ހިންގާ ވެރިން ކުރާ މަސައްކަތަކީ ޤައުމީ މަސައްކަތެއް ކަމަށް ހެލްތް މިނިސްޓަރު އަބްދުﷲ އަމީން ވިދާޅުވެއްޖެ އެވެ.
ރައީސް އިބްރާހީމް މުހައްމަދު ސޯލިހުގެ ވައުދުތަކުގެ ތެރޭގައި ހިމެނޭ "ފަސްޓް ރެސްޕޮޑެންޓް ކެއާ" ދަސްކޮށްދިނުގެ ޕްރޮގްރާމްގެ ދަށުން ޓެކްސީ ޑްރައިވަރުންނަށް ފަސްޓް ރެސްޕޮޑެންޓް ކެއާ ދަސްކޮށްދިނުމުގެ ގޮތުން ބޭއްވި ޖަލްސާގައި ވާހަކަފުޅު ދައްކަވަމުން މިނިސްޓަރު އަމީން މިއަދު ވިދާޅުވީ، ފަސްޓް ކެއާ ފޯރުކޮށް ދިނުމުގައި ޑްރައިވަރުންގެ ދައުރު ބޮޑު ކަމަށާއި އިންސާނެއްގެ ފުރާނަ ސަލާމަތް ކޮށްދިނުން ނުވަތަ މީހެއްގެ ފުރާނަ ސަލަމަތް ކޮށްދިނުމަށް އެހީވެދިނުމަކީ އިންސާނިއްޔަތުގެ އެންމެ މަތީ ދަރަޖަ ކަމަށެވެ. އެކަމުގައި ޑްރައިވަރުންގެ ދައުރުވަރަށް ބޮޑުކަން މިނިސްޓަރ ފާހަގަ ކުރެއްވިއެވެ.
"ޑްރައިވަރުން އެބަހުރި މީގެ ކުރިންވެސް ފަސްޓް ކެއާ ފޯރުކޮށްދީފައި. ޓެކްސީ ޑްރައިވަރުން އަދި ޓެކްސީ ސެންޓަރުތަކުން ކުރަމުންދަނީ ގައުމީ މަސައްކަތެއް" ހެލްތު މިނިސްޓަރު ވިދާޅުވި އެވެ.
ހަތް ގަނޑިއިރަށް މިއަދު ކުރިއަށް ގެންދާ މި ކޯހުގައި ކުއްލި ހާލަތެއްގައި ބަލިމީހުން އުފުލާނެ ގޮތާއި، ސީޕީއާރު އަދި އެހެނިހެން އަވަސް ފަރުވާތަށް ދޭނެ ގޮތް ޑްރައިވަރުންނަށް ދަސްކޮށްދޭނެ އެވެ.
