ޤުރްއާނާއިބެހޭ މަރުކަޒުގެ ނަން "ކީރިތި ޤުރްއާނާއިބެހޭ ޤައުމީ މަރުކަޒު" ގެ ނަމަށް ބަދަލު ކޮށްފިއެވެ.
ރައީސް އޮފީހުން ބުނިގޮތުގައި މިއީ ރައީސް އިބްރާހިމް މުޙައްމަދު ޞާލިޙުގެ އެންގެވުމަށް ގެނައި ބަދެލެކެވެ. އަދި މިބަދަލު ގެނެސްފައިވަނީ މިއަދު ކަމަށް ވެސް ރައީސް އޮފީހުން ބުނެފައިވެއެވެ.
މިމަރުކަޒަކީ ކީރިތި ޤުރްއާނާއިބެހޭ ޢިލްމުތައް އުނގަންނައިދީ ޤުރްއާނުގެ ތާރީޚާއިބެހޭ ދިރާސާތައް ކުރަން އުފައްދާފައިވާ މަރުކަޒެކެވެ.
މީގެއިތުރުން އެމަރުކަޒުގައި ކުރާ ބައެއް މަސައްކަތްތަކުގައި ހިމެނެނީ، ބައިނަލް އަގުވާމީ ޤުރްއާން މުބާރާތްތަކުގައި ދިވެހިން ބައިވެރި ކުރުމާއި ޤުރްއާން މުދައްރިސުންނާއި އިމާމުން ތަމްރީނު ކުރުމާއި ބޭރުގެ ފަންނީ އެހީތެރިކަން ހޯދުން ހިމެނެއެވެ.
ކީރިތި ޤުރްއާނާއިބެހޭ ޤައުމީ މަރުކަޒަކީ އިސްލާމިކް މިނިސްޓްރީގެ ދަށުން ހިންގާ މަރުކަޒެކެވެ.
