ﷲ ތަޢާލާއަށް ބިރުވެތިވަން ހެއްޔެވެ؟ ނަރަކައަށް ބިރުގަނޭ ހެއްޔެވެ؟ މީހަކު ސުވާލުކޮށްފިނަމަ އެންމެންވެސް ބިރުގަންނަ ކަމަށް ވަރަށް ބާރަށް ބުނާނެއެވެ. ހިތާމައަކީ ދުލުން އެހެން ބުނި ނަމަވެސް އެކަން އަމަލުން ނުފެންނަކަމެވެ. އަމަލުތަކުން ފެންނަނީ ނަރަކަ ޢާއި ކައިރިވަމުންދާތަން ކަމެވެ.
މިސާލަކަށް ކަރަންޓުގައި ޖެހިދާނެތީ އަހަރެމެން ބިރުގަނެއެވެ. އެހެންވީމާ ކަރަންޓްގައި ޖެހިދާނެ އެއްވެސް ކަމެއް އެއްވެސް މީހަކު ނުކުރާނެއެވެ. އެކްސިޑެންޓްވެދާނެތީ ބިރުގަންނަ މީހުން ޓްރެފިކް ޤަވާއިދުތަކަށް ޙުރުމަތްތެރިކޮށް ހިތާނެއެވެ. އަނބިމީހާ ވަރިވެދާނެ ކަމަށް ބިރުގަންނަ މީހުން އަނބިމީހާ ރުޅިއަތުވެދާނެ އެއްވެސް ކަމެއް ނުކުރާނެއެވެ! މިއީ ދުނިޔަވީ ކަންކަމުގައިވެސް ފެންނަމުންދާ މިސާލުތަކެވެ.
ނަރަކައަށް ދާން މިޖެހެނީ 2 ކަމަކުންނެވެ. އެއްކަމަކީ ﷲ ތަޢާލާ ނަހީކުރައްވަވާފައިވާ ކަންކަން ކުރުމެވެ. ދެވަނަ ކަމަކީ ކުރުމަށް ފަރުޟު ކުރައްވަވާފައިވާ ކަމެއް ނުކުރުމެވެ.
އެހެންކަމަށްވާއިރު ނަރަކަ ދެކެ ނުވަތަ ނަރަކައަށް ދާން ޖެހިދާނެތީ ބިރުގަންނަ މީހުން ﷲ ތައާލާ ނަހީ ކުރައްވަވާފައިވާ ކަންކަން ކުރަނީ ކީއްވެގެން ހެއްޔެވެ؟ ﷲ ތަޢާލާ ފަރުޟު ކުރައްވަވާފައިވާ ކަންކަން ނުކުރަނީ ކީއްވެގެން ހެއްޔެވެ؟ ނިކަން ބުނެބަލާށެވެ. މި ދަރުސް އަޑު އެހުމަށް މިތާމިތިބަ މީހުންގެ ތެރެއިން ހަމަ އެންމެ މީހަކުވެސް އެމީހެއްގެ މުޅި އުމުރުގައި އެންމެ ރެއަކު ނަމަވެސް ﷲ ތަޢާލާއަށް ބިރުން ނުވަތަ ނަރަކައަށް ބިރުން ވިސްނަން އެންމެ ރެއެއްގެ ނަމަވެސް ނިދި ނަގައިލުން ހެއްޔެވެ. ހޭލައި ހުރިން ހެއްޔެވެ؟ ނަމަވެސް އިމްތިހާނަށް ތައްޔާރުވުމަށް ނުވަތަ ލޯބިވެރިޔާ އާއިމެދު ވިސްނުމަށް ކިތައް ރޭގެ ނިދި ނަގައިލިން ހެއްޔެވެ؟
ދެން އޮތީ ލޯބިވުމެވެ. ލޯބިވެރިޔާ އާއި ފޯނުން ވާހަކަދައްކަން މުޅި ރޭގެ ނިދި ނަގައިލުމަކީ އެއްވެސް ބުރަކަމެއް ނޫނެވެ. ރޭ ނިމި އިރު އަރާކަންވެސް ނުއެނގެއެވެ. ނަމަވެސް ނިކަން ބުނެބަލާށެވެ. ކިތައް މީހުން ހަފްތާ ބަނދުގައި ނަމަވެސް ހޭލައި އިނދެ ކީރިތި ޤްރައާން ކިޔަވައިލަން ހެއްޔެވެ؟ ވީއިރު ﷲ ތަޢާލާއަށް ލޯބިވުން ކޮބައިހެއްޔެވެ؟
ދަރުސް ފަށަމުން ބުނިފަދައިން ކޮންމެ މީހަކުވެސް ދުލުން ބުނަނީ ނަރަކަ ދެކެ ބިރުގަންނަ ކަމަށެވެ. އަމަލުން މިފެންނަނީ ނަރަކަ އާއި ކައިރިވަމުން އަންނަތަނެވެ! ސަލާމަތް ވެވޭނެހެއްޔެވެ؟ ނަރަކައިން ސަލާމަތް ވުމަކީ ކަނޑާ ސަޅި ބައިސާއިން ކުރެވެން އޮތް ކަމެއް ނޫނެވެ. ނަރަކައިން ސަލާމަތް ވެވޭނީ ސަލާމަތް ވެވޭނެ ގޮތަށް އަމަލު ކޮށްގެންނެވެ. ވީމާ އަހަރެންގެ އާދޭހަކީ ހަމަ މިވަގުތުން ފެށިގެން ވެސް ކޮންމެ މީހަކީވެސް ނަރަކައިން ސަލާމަތްވުމަށް ގަދައަޅައި މަސައްކަތް ކުރާ މީހަކަށްވުމެވެ. ވަގުތު ފާއިތު ނުވަނީސް ތައުބާވެ ހެޔޮ އަމަލުކުރާ މީހަކަށްވުމެވެ!
- ޝައިޚް ޢުމަރު އަލްބައްނަގެ ދަރުސަކުން
