ހެލްތު މިނިސްޓްރީގެ ޑެޕިއުޓީ މިނިސްޓާރ ޝިޔާމާ މުޙައްމަދުގެ އާއިލާގެ މެމްބަރުންތަކަކަށް އައްޑޫ ސިޓީ ހިތަދޫގައި ބަޔަކު ހަމަލާ ދީފިއެވެ.
މައުލޫމާތު ލިބިފައިވާ ގޮތުގައި ރޭ 11 ޖަހާކަންހާއިރު ހިނގި އެމާރާމާރީގައި ޝިޔާމާގެ އާއިލާގެ ދެ ކުއްޖަކަށް އަނިޔާވެފައިވާއިރު، އޭގެ ތެރެއިން އެއް ކުއްޖަކަށް ސީރިއަސް އަނިޔާތަކެއް ވެސް ވެފައިވެއެވެ.
އެނގިފައިވާ ގޮތުގައި އަނިޔާވި ދެމީހުންގެ ތެރެއިން ހާލު ސީރިއަސްވި މީހާގެ ބޮލަށް ވަނީ ދަގަނޑު ހޮޅިބުރިއަކުން ހަމަލާދީފައެވެ. އަދި އަނެއް މީހާގެ އަތަށް ވަރަށް ބޮޑަށް އަނިޔާ ލިބިފައިވާ ކަމަށް ވެސް މައުލޫމާތު ލިބިފައިވެއެވެ.
އެމީހުންނަށް ހަމަލާދީފައިވަނީ އެ ދެ މީހުންގެ ދިރިއުޅޭ ގޭގެ ދޮރުމަތިން ކަމަށާއި ދެ މީހުންނަށް ވެސް ހިތަދޫ ރީޖަނަލް ހޮސްޕިޓަލުން ފަރުވާ ދީފައިވާ ކަމަށް މައުލޫމާތު ލިބިފައިވެއެވެ.
މިމާރާމާރީއާއި ގުޅިގެން އަދި އެއްވެސް މީހަކު ހައްޔަރު ކުރި ކަމެއް އެނގިފައެއް ނުވެއެވެ. އަދި މިކަމާއި ގުޅޭގޮތުން ފުލުހުންގެ ބަހެއް ވެސް އަދި ވަނީ ލިބޭ ގޮތް ނުވެފައެވެ.
