ދިވެހި ރައްޔިތުންގެ ހިތްތަކުގައި އިސްލާމް ދީނަށް ލޯބި އިތުރުކުރުމަށާއި ރައްޔިތުންގެ ދީނީ ޢަޤީދާ ވަރުގަދަކުރުމަށް އިސްލާމް މިނިސްޓްރީން ކުރަމުން ގެންދާ މަސައްކަތްތައް މުޅި ރާއްޖޭގައިވެސް އިތުރަށް ވަރުގަދަކޮށް ފުޅައުކުރައްވަވާނެ ކަމަށް އިސްލާމިކް މިނިސްޓަރު ޑރ. އަހްމަދު ޒާހިރު ޢަލީ ވިދާޅުވެއްޖެއެވެ.
ޑރ. އަޙްމަދު ޒާހިރު މިކަން ހާމަކުރައްވާފައިވަނީ އިސްލާމިކް މިނިސްޓްރީނެ ރޭ ބޭއްވި ދަރުސް ފެށުމުގެކުރިން ވާހަކަފުޅު ދައްކަވަމުންނެވެ.
ޑރ. ޒާހިރު ވިދާޅުވީ އިސްލާމިކް މިނިސްޓްރީން އިންތިޒާމުކޮށްގެން ބާއްވާ ޚާއްޞަ ދަރުސްތައް ބާއްވަވާނީ ކޮންމެ 2 މަހަކުން ކަމަށެވެ. ދަރުސްތަކުގެ އިތުރުން ތަފާތު ދާއިރާތަކަށް ޚާއްޞަކޮށްގެން ދީނީ ހޭލުންތެރި ކުރުވުމުގެ ޕްރޮގްރާމްތައް ކުރިއަށް ގެންދަވާނެ ކަމަށެވެ.
ޑރ. ޒާހިރު ވިދާޅުވީ ޚާއްޞަ އެހީތެރިކަމަށް ބޭނުންވާ ފަރާތްތަކަށާއި އެނޫންވެސް ތަފާތު ފަރާތްތަކަށް ދީނީ ޕްރޮގްރާމްތައް ކުރިއަށް ގެންދަވާނެ ކަމަށާއި ތަފާތު ގިންތިތަކަށް އަމާޒުކުރައްވައިގެން ޕްރޮގްރާމްތައް ހިންގަވާނެ ކަމަށާއި އަދި ޤައިދީންނަށް ހިންގާ ޕްރޮގްރާމްތައް އިތުރު ކުރައްވާނެ ކަމަށެވެ.
މީގެ އިތުރުން ރާއްޖޭގެ ކަންކޮޅުތަކުގައި ޕްރޮގްރާމްތައް ހިންގުން އިތުރު ކުރައްވާނެ ކަމަށާއި މާލެއިން ޢިލްމުވެރިން ފޮނުއްވައިގެން ހިންގަވާ ޕްރޮގްރާމްތައް ވެސް އިތުރުކުރައްވަވާނެ ކަމަށްވެސް ޑރ. ޒާހިރު ވިދާޅުވިއެވެ.
ޑރ. ޒާހިރު މިމޭރުމުން ވިދާޅުވެފައިވާއިރު ގިނަ ބައަކު ބުނަމުން ގެންދަނީ ދީނީ ކަންކަން މިހާރު އޮތް ހާލަތުން ބަދަލުކުރުމަށްޓަކައި ދަރުސް ދިނުމުން އެކަނި ނުފުދޭނެ ކަމަށާއި އަމަލީ ގޮތުން ދީނީ ކަންކަމަށް އަހުލުވެރި ކުރުވުމަށްވެސް މަސައްކަތްތަކެއް ކުރަން ޖެހިފައިވާ ކަމަށެވެ.
