އިސްލާމް ދީނަށް އަމަލުކުރާނަމަ އަނިޔާތައް އެކި ގޮތްގޮތުން ކުރިމަތިވާނެއެވެ. އެއީ އަބަދުވެސް އެކަން ވަމުން އައިސްފައިވާ ގޮތެވެ. އިސްލާމް ދީނުގެ ކުރީކޮޅު ބިލާލުގެފާނަށް އަނިޔާކުރީ 55 ޑިގްރީއަށް ހޫނުގަދަ މައްކާގެ ބިންމަތީގައެވެ. ރާއްޖޭގައި ހޫނުމިން އެންމެ މައްޗަށް މިދަނީ 34 ޑިގްރީއަށެވެ. 34 ޑިގްރީގައި އަޅުގަނޑުމެންނަށް މިއުޅެނީ ހޫނަށް ކެތް ނުކުރެވިގެންނެވެ. 55 ޑިގްރީގެ އެ ގަދަ ހޫނުގައި ބިލާލުގެފާނުގެ ހަށިކޮޅު ފިއްސަމުން ބިލާލުގެފާނުގެ ހަށިކޮޅުގައި ވައުޖަހައި މޮޔައިންނާއި ކުޑަކުދިންލައްވައި މައްކާގެ މަގުތައްމަތީގައި ދެންމުވިއެވެ. ހަށިކޮޅުން ލޭ އޮހޮރެމުންދިއައިރު ވެސް އެ ހުރިހާ މުޞީބާތްތަކަށް ބިލާލުގެފާނު ކެތްތެރިވެވަޑައިގެންނެވިއެވެ.
އިސްލާމް ދީނަށްޓަކައި އެންމެ ފުރަތަމަ ލޭ އޮހޮރި ޝަހީދުވެގެން ދިއަ ބޭކަނބަލަކީ ސުމައްޔާ (ރޢ)އެވެ. އެއީ ވަރަށް ކުޑަކުޑަ އަޅު ޢާއިލާއެކެވެ. އެ ޢާއިލާގެ 3 މީހުން (ސުމައްޔާ އާ ފިރިކަލުންނާ ދަރިކަލުން) އިސްލާމްވުމުން ގަސްތަކުގައި ބަނދެ މުޝްރިކުން އަނިޔާކުރަމުން ގެންދިއައެވެ. އެތަން ރަސޫލް (ޞޢވ) އަށް ފެނިވަޑައިގަންނަވައެވެ. ނަމަވެސް އެއިރު އެކަން ހުއްޓުވޭނެ އެއްވެސް ބާރެއް ރަސޫލް (ޞޢވ) އަށް ލިބިވަޑައިގެންފައެއް ނުވެއެވެ. އެހެންކަމުން ހިތްޕުޅުން ކީރިތި ކުރައްވަވަމުން ކައިރިން ވަޑައިގަންނަވަމުން ޙަދީޘްފުޅު ކުރެއްވެވީ "ޔާސިރުގެ ޢާއިލާއެވެ! ތިއަބައިމީހުންނަށް ކެތްތެރިކަން ހުއްޓެވެ. ތިއަބައިމީހުންނަށް ވަޢުދު ކުރެއްވެވިގެންވާ ތަނަކީ ސުވަރުގެއެވެ." އެއާއިއެކު އެއާއިލާގެ ޢަޒުމް އެތައް ގުނައަކަށް ވަރުގަދަވެގެންދިއައެވެ. އެންމެފަހުން އަބޫ ޖަހުލު އައިސް ސުމައްޔާގެ ހަށިކޮޅަށް ލޮންސިއެއް ހަރައި ހަށިކޮޅާއި ފުރާނަ ވަކިކޮށްލީއެވެ.
މިއީ ހަމަ އަޅުގަނޑުމެން ފަދަ ހަމާއި މަހާއި ކަށިން އުފައްދަވާފައިވާ މީހުން ﷲގެ މަގުގައި ސާބިތުވުމުން އުފުލަންޖެހިފައިވާ ވޭންތަކެވެ.
އިސްލާމް ދީންމަތީގައި އުފަންވުމުގެ ނިޢްމަތް ﷲ ތަޢަލާ ވަނީ އަޅުގަނޑުމެންނަށް ދެއްވަވައިފައެވެ. އެއީ އިންސާނަކަށް ލިބޭނެ އެންމެ މަތިވެރި ނިޢްމަތެވެ. އެކަމުން އެނގެނީ އަޅުގަނޑުމެންނަކީ ﷲ ތަޢާލާ އިޚްތިޔާރުކުރައްވަވާފައިވާ ބައެއް ކަމެވެ. އެހެންކަމުން އެ ނިޢްމަތަށް ފުރަގަސް ނުދެއްވާށެވެ.
ނިކަން ވިސްނަވައިބައްލަވާށެވެ! ދުނިޔެގައި 7 ބިލިއަނާއި ގާތަށް މީހުން އެބައެބައުޅެއެވެ. އެއިގެ ތެރެއިން އިސްލާމް ދީނުގެ ހިދާޔަތް ދެއްވަވާފައިވަނީ ކިތައް މީހުންނަށްތޯއެވެ! ވީއިރު އަޅުގަނޑުމެންނަށް ދެއްވަވާފައި މިވަނީ ކިހައި މަތިވެރި ނިޢްމަތެއްތޯއެވެ.
އިސްލާމް ދީން ނޫން އެހެން ދީނެއް ﷲ ޤަބޫލުފުޅު ނުކުރައްވަވާނެއެވެ. ﷲގެ ޙަޟްރަތުގައި ދީނަކީ ހަމައެކަނި އިސްލާމް ދީން ކަމުގައި ﷲ ވަނީ ވަޙީ ކުރައްވަވައިފައެވެ.
އެހެންކަމުން ދުނިޔޭގައި ކިތަންމެ ރަނގަޅު ގޮތުގައި އުޅުނު ނަމަވެސް އިސްލާމް ދީން ނޫން އެހެން ދީނެއްގެ މަތީގައި އެމީހަކު މަރުވެއްޖެނަމަ އެމީހަކަށް ލިބޭނެ އެއްވެސް މޮޅެއް އަދި އުފަލެއް ނެތެވެ. އެފަދަ މީހަކަށް އާޚިރަތް ދުވަހު އެއްވެސް ނަޞީބެއް ނެތެވެ. އެފަދަ މީހުން ވަނީ ގެއްލެނިވެގެންނެވެ.
- ޝައިޚް ޢަލި ޒައިދު މިއަދު ވިދާޅުވި ޚުޠުބާއިން
