ސްރީލަންކާއިން ދިވެހިންނާއިމެދު ބަހައްޓާ ގާތް ގުޅުމަށް ރައީސް ޞާލިޙް ތަޢްރީފް ކުރައްވައިފި

- ރައީސް ޞާލިޙް ސްރީލަންކާއަށް ކުރައްވާ ނުރަސްމީ ‏‏ދަތުރުފުޅެއްގައި ފުރާވަޑައިގެންފި‏

ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، ސްރީލަންކާއަށް ކުރައްވާ ‏‏ތިން ދުވަހުގެ ނުރަސްމީ ދަތުރުފުޅެއްގައި، މިއަދު ފުރާވަޑައިގެންފިއެވެ.

ދަތުރުފުޅަށް ފުރާވަޑައިގަތުމުގެ ކުރިން އެމަނިކުފާނު ވަނީ ސްރީލަންކާ ސަރުކާރުން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު މޭޖަރ ޖެނެރަލް (ރިޓަޔަރޑް) ބީ.އާރ.ޑަބްލިއު.އެމް.އާރ.އޭ.ބީ. ތޮރަޑެނިޔަ އާއި ބައްދަލު ކުރައްވައި ދިވެހިރާއްޖެއާއި ސްރީލަންކާއާ ދެމެދުގައި އޮތް ގުޅުން އިތުރަށް ހަރުދަނާކޮށް ބަދަހި ކުރެވިދާނެ ގޮތްތަކާ ބެހޭގޮތުން މަޝްވަރާ ކުރައްވައިފައެވެ.

ސްރީލަންކާގެ ސަފީރު، ރައީސުލްޖުމްހޫރިއްޔާގެ އަރިހަށް މިއަދު ކުރެއްވި އިޙްތިރާމުގެ ޒިޔާރަތުގައި ރައީސް އިބްރާހީމް މުޙައްމަދު ޞާލިޙް ވަނީ ރާއްޖޭގެ ކުރިއެރުމުގައި ސްރީލަންކާ ރައްޔިތުންގެ ހިއްސާ މުހިންމުކަން ފާހަގަކުރައްވައި، އެކި ބޭނުންތަކަށް ސްރިލަންކާއަށް ޒިޔާރަތްކުރާ ދިވެހިންނަށާއި، އެޤައުމުގައި ދިރިއުޅޭ ދިހަ ހާހަށްވުރެ ގިނަ ދިވެހިންނާއި ދޭތެރޭ ސްރީލަންކާއިން ބަހައްޓާ ގާތްކަމަށް ތަޢްރީފް ކުރައްވައި ޝުކުރު އަދާ ކުރައްވައިފައެވެ.
 
މިއަދު ރައީސުލްޖުމްހޫރިއްޔާގެ އޮފީހުގައި ބޭއްވެވި މި ބައްދަލުކުރެއްވުމުގައި ވާހަކަފުޅު ދައްކަވަމުން، ސްރީލަންކާއަކީ ރާއްޖޭގެ އެންމެ ގާތް އެކުވެރި ޤައުމުކަމުގައި ވިދާޅުވެ، ސްރީލަންކާއަކީ ރާއްޖޭގެ ތަރައްޤީގެ މުހިންމު ބައިވެރިއެއްގެ ގޮތުގައި ރައީސް އިބްރާހީމް މުޙައްމަދު ޞާލިޙް ވަނީ ސިފަ ކުރައްވައިފައެވެ. އަދި ދެޤައުމުގެ ދެމެދުގައި ސިޔާސީ ގުޅުން ޤާއިމުވީ ފަހުން 54 އަހަރުވެފައިވާކަން ރައީސުލްޖުމްހޫރިއްޔާ ފާހަގަ ކުރެއްވިއެވެ.
 
މި ބައްދަލުކުރެއްވުމުގައި ސްރީލަންކާގެ ސަފީރު ދެއްކެވި ވާހަކަފުޅުގައި، ދިވެހިރާއްޖެއަކީ ސްރީލަންކާގެ ވަރަށް ގިނަ ރައްޔިތުންނަށް ވަޒީފާ އަދާކުރަން މަގުބޫލު މަންޒިލެއް ކަމުގައި ވިދާޅުވެ، ރާއްޖޭގައި ގިނަ އަދަދެއްގެ ސްރީލަންކާ ރައްޔިތުން ވަޒީފާ އަދާކުރާކަން ފަހަގަ ކުރައްވައިފައެވެ. އަދި ނިމިދިއަ ރިޔާސީ އިންތިޚާބުގައި ރައީސް އިބްރާހީމް މުޙައްމަދު ޞާލިޙް ހޯއްދެވި ކާމިޔާބީއަކީ ދިވެހިންގެ އަޒުމް ވަރުގަދަކަން ސާބިތުކޮށްދިން ކަމެއް ކަމުގައި ސްރީލަންކާ ސަފީރު ވަނީ ވިދާޅުވެފައެވެ.