ލިޔުނީ: ޒިދާން މުހައްމަދު
ދިވެހިރާއްޖޭގެ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހާއި، އެމަނިކުފާނުގެ ނައިބް ފައިސަލް ނަސީމުގެ އިތުރަށް މިނިސްޓަރުން ހިމެނޭހެން، ދައުލަތުގެ އިސްވެރިންގެ މާލީ ބަޔާންތައް އަންނަ ހަފްތާ ތެރޭގައި އާއްމު ކުރައްވަން ނިންމަވައިފިއެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން، ޕޮލިސީ ސެކްރަޓަރީ އައިމިނަތު ޝައުނާ ވިދާޅުވީ މާލީ ބަޔާންތައް އާއްމު ކުރާނީ އަންނަ ހަފްތާ ތެރޭގައި ގާއިމް ކުރުމަށް ހަމަޖެހިފައިވާ ކަރޮޕްޝަން މައްސަލަތައް ރިޕޯޓްކުރާ ޕްލެޓް ފޯމްގެ ތެރެއިން ކަމަށެވެ.
"ރައީސުލްޖުމްހޫރިއްޠާ އަދި ރައީސުލްޖުމްހޫރިއްޔާގެ ނައިބާއި ވަޒީރުންނާއި މި އޮފީހުގެ ހުރިހާ ސިޔާސީ ހުރިހާ މުވައްޒަފުންގެ މާލީ ބަޔާންތައް އަޅުގަނޑުމެން މި އަންނަ ހަފްތާ ތެރޭގައި ހާމަ ކުރާނަން" އޭނާ ވިދާޅުވިއެވެ.
މީގެ އިތުރުން، ރައީސް އޮފީހުގެ ތަރުޖަމާނު އިބްރާހިމް ހޫދު ވިދާޅުވީ ކެބިނެޓްގެ އިތުރަށް ރައީސް އޮފީހުގައި މަސައްކަތް ކުރައްވާ ސިޔާސީ ބޭފުޅުންގެ މާލީ ބަޔާންތައް އާންމުކުރަން އެ އޮފީހުން ތައްޔާރުވެފައިވާ ކަމަށެވެ.
ދައުލަތުގެ އިސްވެރިންގެ މާލީ ބަޔާންތައް އާއްމު ކުރުމަކީ އިބްރާހިމް މުހައްމަދު ޞާލިޙްގެ ރިޔާސީ ވައުދެކެވެ.
