ރާއްޖޭގެ ފަތުރުވެރިކަމަށް މިދިއަ އަހަރުގެ ނޮވެމަބރު މަހުގެ ނިޔަލަށް 7%ގެ ކުރިއެރުމެއް ލިބިފައިވާއިރު ސައުދިއަރަބިޔާއިން ރާއްޖެ އަންނަ ފަތުރުވެރިންގެ އަދަދު އެމުއްދަތުގައި ވަނީ 16% އިތުރުވެފައިވާކަމަށް ތަފާސް ހިސާބުތަކުން ދައްކައިފިއެވެ.
ސަޢުދީއަރަބިޔާ އަކީ މެދުއިރުމަތީން ދިވެހިރާއްޖެއަށް އެންމެ ގިނަ ފަތުރުވެރީން އަންނަ ގައުމެވެ. އަދި މިއީ ހަލުވި ކަމާއިއެކު ބޮޑުވަމުން އަންނަ މާކެޓެކެވެ. 2017 ވަނަ އަހަރާއި އަޅާ ބަލާއިރު، ނިމިގެންދިއަ އަހަރުގެ ޖެނުއަރީ އިން ނޮވެމްބަރަށް، ސަޢޫދީ އަރަބިއާއިން ދިވެހިރާއްޖެއަށް ޒިޔާރަތް ކުރި ފަތުރުވެރީންގެ ޢަދަދު ވަނީ 16 އިންސައްތަ އިތުރުވެފައެވެ. މި މުއްދަތުގައި 21،475 ސަޢޫދީ ފަތުރުވެރީން ވަނީ ރާއްޖެއަށް ޒިޔާރަތް ކޮށްފައެވެ.
މިއަހަރުގެ ފުރަތަމަ ފަތުރުވެރިޔާއަކީ ސަޢޫދީގެ ރައްޔިތަކަށް ވުމުން މެދުއިރުމަތީގައި ދިވެހިރާއްޖެ އިޝްތިހާރު ވެގެން ދާނެއެވެ.
އެމް.އެމް.ޕީ އާރް.ސީ އިން ކޮންމެ އަހަރެއްގެ ފުރަތަމަ ފަތުރުވެރިޔާގެ އިތުރުން ފަސް ލައްކަ ވަނަ ފަތުރުވެރިޔާ، ހަތްލައްކަ ފަންސާސް ހާސް ވަނަ ފަތުރުވެރިޔާ އަދި އެއް މިލިޔަން ވަނަ ފަތުރުވެރިޔާ ފާހަގަކޮށް މަރުޙަބާ ކިޔައެވެ. 2018 ވަނަ އަހަރުގެ ޖެނުއަރީ އިން ނޮވެމްބަރުގެ ނިޔަލަށް ޖުމްލަ 1،333،456 ފަތުރުވެރީން ރާއްޖެއަށް ޒިޔާރަތްކޮށްފައި ވެއެވެ. މިއީ އޭގެ ކުރީ އަހަރުގެ މި މުއްދަތާއި އަޅާ ބަލާއިރު، 7 އިންސައްތައިގެ ކުރިއެރުމެކެވެ.
ޓޫރިޒަމް މިނިސްޓަރު ޢަލީ ވަޙީދު އިއްޔެ ވިދާޅުވީ ދިވެހިރާއްޖެއިން މިއަހަރު އަމާޒު ހިފާނެ އެއް ކަމަކީ ދެމެހެއްޓެނިވި ފަތުރުވެރިކަމާއި، ފަތުރުވެރީން ރާއްޖެ އަންނަ ވަގުތު މިހާރަށްވުރެ ހިތްގައިމު ތަޖުރިބާއެއް ކުރެވޭނެ ގޮތަށް ކަންކަން ތަރައްގީ ކުރުމަށް ކަމަށެވެ. މިގޮތުން އެއަރޕޯޓްގެ މަސައްކަތް ކުރިއަށްދާނީ އެ ކަންކަމަށް ވިސްނައިގެން ކަމަށް ވެސް ވިދާޅުވިއެވެ.
އެމް.އެމް.ޕީ.އާރް.ސީގެ މެނޭޖިންގ ޑިރެކްޓަރު ޠައްޔިބް ވިދާޅުވީ ނިމިގެން ދިއަ އަހަރަށްވުރެ މިއަހަރު ރާއްޖެއަށް ޒިޔާރަތްކުރާ ފަތުރުވެރީންގެ ޢަދަދު އިތުރު ކުރުމަށް އެ ކުންފުނިން ގިނަ ކަންތައްތަކެއް ރޭވިފައި ވާ ކަމަށެވެ. އަދި ކުރިއަށް އޮތްތަނުގައި އެ ކަންކަމުގެ ތަފްސީލް މީޑިއާ އާއި ޙިއްސާ ކުރައްވާނެ ކަމަށެވެ.
