ޚަބަރުތައް ހާމަކުރުމުގައި ޤައުމުގެ މަޞްލަހަތަށް އިސްކަން ދީގެން ޚަބަރުތައް ހާމަކުރުމަށް އިސްލާމިކް މިނިސްޓަރ ޑރ. އަޙްމަދު ޒާހިރު އެދިވަޑައިގެންފި އެވެ. އެމަނިކުފާނު މިކަމަށް އެދިވަޑައިގަތީ މީޑިއާތަކުގެ އިސް ފަރާތްތަކާއިއެކު މިއަދު ބޭއްވެވި ބައްދަލު ކުރެއްވުމެއްގައެވެ.
މި ބައްދަލު ކުރެއްވުމުގައި ޑރ. އަހްމަދު ޒާހިރު ވިދާޅުވީ އިސްލާމިކް މިނިސްޓްރީން ކުރިއަށް އޮތްތަނުގައި މީޑިއާތަކާއި ވަރަށް ގާތުން މަސައްކަތް ކުރާނެ ކަމަށާއި މީޑިއާތަކަށް ބޭނުންވާ މައުލޫމާތު ހާމަކޮށްދެއްވަވާނެ ކަމަށެވެ. އިސްލާމިކް މިނިސްޓްރީ އުފެދިގެން އައިރު މީޑިއާތަކާއި ގުޅުން އޮތް މިންވަރަށް ގުޅުން ބަދަހިކުރައްވާނެ ކަމަށެވެ.
މިއަދުގެ ބައްދަލުކުރުމުގައި ނޫސްވެރިން ވަނީ އިސްލާމިކް މިނިސްޓްރީން ފާއިތުވި 3 އަހަރެއްހައި ދުވަހު އަމަލުކުރަމުން އައިސްފައިވާ ގޮތުން ކުރިމަތިވި ދަތިތައް ހާމަކޮށްފައެވެ. އަދި އިސްލާމިކް މިނިސްޓަރަކީ ނޫސްވެރިންނަށް ފިއްލަވައިގެން ނުއުޅުއްވަވާ، ނޫސްވެރިންގެ ސުވާލުތަކަށް ޖަވާބު ދެއްވާ ބޭފުޅަކަށްވެވަޑައިގަތުމަށް ވެސް އެދިފައެވެ.
ފާއިތުވި 3 އަހަރު ދުވަހަށް ބަލާނަމަ އިސްލާމިކް މިނިސްޓްރީ ފާހަގަކުރެވިފައިވަނީ ކޮރަޕްޝަނުގެ މައްސަލަތައް އެންމެ ގިނަ އެއް މިނިސްޓްރީ ކަމަށެވެ. ޚާއްޞަކޮށް ޒަކާތު ފައިސާ ނަހަމަ ގޮތުގައި ބޭނުންކުރުމުގައި ރާއްޖޭގައި ރެކޯޑް ހެދި 3 އަހަރަށެވެ.
