ސުޕަރ ފެންފުޅި ތަޢާރަފްކޮށް ޕްލާސްޓިކް ފުޅި މަދުކުރުމުގެ ޤައުމީ ކެމްޕެއިން ރަސްމީކޮށް އިފްތިތާޙްކޮށްފި އެވެ.
އެންވަޔަރަންމަންޓް މިނިސްޓްރީން މިއަދު ތަޢާރަފްކުރި 'ސުޕަރ ފެންފުޅި' އަކީ އެއްފަހަރު ބޭނުންކޮށްފައި އެއްލާލެވޭ ނުވަތަ ސިންގަލް-ޔޫސް ޕްލާސްޓިކް މަދުކުރުމަށްޓަކައި މިނިސްޓްރީ އޮފް އެޑިއުކޭޝަންއާއި ގުޅިގެން ޔުނިސެފް ގެ އެހީގައި ރާއްޖޭގެ ހުރިހާ ސުކޫލްތަކަށް ފޯރުކޮށްދެވޭ ފުޅިއެކެވެ.
މިއަދުގެ ހަރަކާތުގައި 15 ސްކޫލަކަށް ވަނީ ފުޅި ޙަވާލުކޮށްފައެވެ. އަދި ރާއްޖޭގެ 3 ސަރަޙައްދެއްގައި 'ސުޕަރ ފެންފުޅި' ސްކޫލްތަކާއި ހަވާލުކުރުމުގެ ހަރަކާތްތަކެއް ޔުނިސެފާއި، މިނިސްޓްރީ އޮފް އެޑިޔުކޭޝަންއާއި ގުޅިގެން ކުރިއަށް ގެންދިއުމަށް ވަނީ ރޭވިފައެވެ.
އެންވަޔަރަންމަންޓް މިނިސްޓްރީން ބުނީ ކުޑަ ކުދިންނަށް ޙާއްޞަކޮށްގެ ތައްޔާރުކޮށްފައިވާ މި 'ސުޕަރ ފެންފުޅި' އަކީ ކެމިކަލްގެ ވިހަ މާއްދާއެއް ކަމައްވާ ބީ.ޕީ.އޭ ނުހިމެނޭ ގޮތަށް ތައްޔާރުކޮށްފައިވާ ފެންފުޅިއެއް ކަމަށެވެ. އަދި މި ކެމްޕެއިންގެ މަގުޞަދަކީ ޕްލާސްޓިކްގެ ސަބަބުން ތިމާވެއްޓަށް ކުރާ ނޭދެވޭ އަސަރު ކުޑަކުރުމަށް ބާރު އެޅުމާއި ކުޑަކުދިން މިކަންތައްތަކަށް ހޭލުންތެރިކުރުވުން ކަމަށެވެ.
މީގެ އިތުރުން މިނިސްޓްރީން މިހާރުވަނީ ފޭސް އައުޓް ޕްލޭނެއްގެ ދަށުން ސިންގަލް ޔޫޒް ޕްލާސްޓިކްގެ ހުރިހާ ބާވަތެއް ރާއްޖެއަށް އެތެރެކުރުމާއި ރާއްޖޭގައި އުފެއްދުން ހުއްޓުވުމަށް ވަނީ ނިންމާފައެވެ. އެގޮތުން މިކަން ކުރާނެގޮތުގެ ސްޓްރެޓަޖީ އެކުލަވާލުމުގެ މަސައްކަތް މިހާރުވަނީ ފަށައިފައެވެ.
މި ކެމްޕެއިންގެ ދަށުން ޕްލާސްޓިކު އުފެދޭ މިންވަރު މަދުކުރުމަށާއި އަލުން ބޭނުންކުރުމުގެ އާދައަށް ކުޑަކުދިން އަހުލުވެރި ކުރުވުމުގެ ގޮތުން މިނިސްޓްރީ އޮފް އެޑިއުކޭޝަން އާއި މިނިސްޓްރީ އޮފް އެންވަޔަރަންމަންޓް އަދި ޔުނިސެފްގެ އެހީގައި ރާއްޖޭގެ ހުރިހާ ސްކޫލްތަކަށް 2019 ވަނަ އަހަރުގެ ގްރޭޑް 1 އަށް އަލަށް ވަންނަ ހުރިހާ ދަރިވަރުންނަށް ރީފިލްކުރެވޭ (ބީޕީއޭ ފްރީ) ފެންފުޅި ފޯރުކޮށްދެވޭނެއެވެ.
މި ހަރަކާތަކީ، ސަރުކާރުގެ ފުރަތަމަ 100 ދުވަހުގެ އެކްޝަން ޕްލޭންގައި ޕްލާސްޓިކް ފުޅި މަދުކުރުމުގެ ޤައުމީ ކެމްޕޭނެއް ފެށުމަށް ވެފައިވާ ވަޢުދުގެ ދަށުން ކުރިއަށް ގެންދެވޭ ހަރަކާތެކެވެ.
