އާދަޔާ ޚިލާފު މަރުތަކާއި ގެއްލުވާލާފައިވާ މީހުންގެ މައްސަލަތައް ބަލަން ރައީސް އިބްރާހިމް މުޙައްމަދު ޞާލިޙު އުފެއްދި ކޮމިޝަނަށް ހުށަހެޅި މައްސަލަތަކުގެ ތަފްސީލު އަންނަ އާދީއްތަ ދުވަހު ހާމަ ކުރަން އެކޮމިޝަނުން ނިންމައިފިއެވެ.
މިފަދަ މައްސަލަތައް އެކޮމިޝަނަށް ހުށަހަޅަން އާންމުންނަށް ހުޅުވާލި އެއް މަސް ދުވަހުގެ މުއްދަތު މިއަދަށް މިވަނީ ހަމަވެފައެވެ.
އެކޮމިޝަންގެ ރައީސް ހުސްނުއްސުއޫދު މިއަދު ކުރެއްވި ޓްވީޓެއްގައި ވިދާޅުވެފައިވަނީ ތަހުގީގު ކުރަން އެދި ގިނަ އަދަދެއްގެ މައްސަލަ ހުށަހަޅާފައިވާ ކަަމަށާއި އެމައްސަލަތަކުގެ ތަފްސީލި އަންނަ އާދީއްތަ ދުވަހު ހާމަ ކުރައްވާނެ ކަމަށެވެ.
އާއްމުންނަށް މައްސަލަތައް ހުށަހަޅަން ފުރުސަތު ދިންިއިރު، އެކޮމިޝަނުން އަމިއްލައަށް އިސްނަގައިގެން ވެސް އަންނަނީ ގިނަ މައްސަލަތަކެއް ބަލަމުންނެވެ. އޭގެތެރޭގައި މުޅި ރާއްޖެ ސިއްސުވާލި އެންމެ ބޮޑު އެއް މަރު ކަމުގައިވާ ޑރ. އަފްރާޝިމް އަވަހާރަ ކޮށްލުމާއި، މިނިވަން ނޫސްވެރިޔާ އަހުމަދު ރިޟްވާން އަބްދުﷲ ގެއްލުވާލި މައްސަލައިގެ އިތުރުން ބްލޮގަރ ޔާމީން ރަޝީދު މަރާލި މައްސަލަވެސް ހިމެނެއެވެ.
އެކޮމިޝަނަށް ހުށަހެޅޭ މައްސަލަތައް ތިން މަސް ދުވަހުގެ ތެރޭގައި ނިންމުމަށް އަމާޒު ކޮށްފައިވެއެވެ. ނަމަވެސް ރައީސް ޞާލިޙު އުފެއްދެވި މިފަދަ ކޮމިޝަންތަކަށް ބޮދެތި ބާރުތަކެއް ދީފައިވާ ބިލް ރައްޔިތުންގެ މަޖިލީހުން ފާސްނުވެ މަޖިލިސް ޗުއްޓީއަށް ގޮސްފައި އޮތުމުން، ހުށަހެޅިފައިވާ މައްސަލަތަކުގެ ތަހުގީގަށް ކޮންމެވެސް ވަރެއްގެ ލަސްކަމެއް އަންނާނެ ކަމަށް އެކޮމިޝަނުން ވަނީ މީގެ ކުރިން ބުނެފައެވެ.
