ފަތުހު ގްރޫޕުގެ ހަވާލުގައި ޙައްޖަށް ދިޔުމަށް 2014 ވަނަ އަހަރު ފައިސާ ދައްކާ، ޙައްޖަށް ނުފުރުނު މީހުން އެފައިސާ ހޯދުމަށް ޝަރީއަތަށް ދާން ނިންމައިފިއެވެ.
ޙައްޖަށް މީހުން ގެންދިޔުމަށް ފަތުހު ގްރޫޕަށް އެއަހަރު 125 މީހުންގެ ކޯޓާއެއް ދޫކުރި ނަމަވެސް، އެއިން އެއްވެސް މީހަކު ޙައްޖަށް ގެންދެވެނެ އިންތިޒާމެއް އެކުންފުންޏަށް ހަމަނުޖެއްސުމުން، ސަރުކާރުން ވަނީ އެމީހުން ޙައްޖަށް ގެންގޮސްދީފައެެވެ.
ނަމަވެސް ފަތުހު ޙައްޖު ގްރޫޕުން އެއިރު އިތުރަށް ފައިސާ ނެގި 72 މީހަކަށް ޙައްޖަށް ދެވޭނެ ގޮތް ސަރުކާރުން ހަމަޖައްސާފައެއް ނުވެއެވެ.
އެގޮތުން ސަރުކާރުގެ ޚަރަދުގައި ޙައްޖަށް ނުދެވުނު މީހުންގެ ފަރާތުން ފައިސާ ހޯދަން ޝަރީއަތަށް ހުށަހަޅަނީ ލިޓިކާ ލޯ އެސޯސިއޭޓްސް ފާމުގެ ފަރާތުންނެވެ. އެނގިފައިވާ ގޮތުގައި އެ ފާމުން އެމައްސަލައިގައި ވަކާލާތު ކޮށްދެނީ ހިލޭ ސާބަހަށެވެ.
ލިޓިކާ ލޯ އެސޯސިއޭޓްސް ލޯ ފާމުން ނެރުނު ބަޔާނެއްގައި ބުނެފައިވަނީ ސަރުކާރު ޚަރަދުގައި އެއިރު ޙައްޖަށް ނުދެވުނު 72 މީހުންގެ ތެރެއިން ބައެއް މީހުން އަމިއްލަ ޚަރަދުގައި ފަހުން ޙައްޖަށް ގޮސްފައިވާ ކަމަށާއި އަދި އަނެއްބައި މީހުންނަށް އަދިވެސް ޙައްޖަށް ނުދެވޭ ކަމަށް މައުލޫމާތު ލިބިފައިވާ ކަމަށެވެ.
އެހެންކަމުން ފަތުހު ގްރޫޕަށް ދެއްކި ފައިސާ އަނބުރާ ހޯދައި ދިނުމަށް އޭގެތެރެއިން ބައެއް މީހުން އެލޯފާމުގައި އެދިފައިވާތީ، އެފައިސާ ހޯދުމަށް ޝަރީއަތަށް ހުށަހަޅަން ނިންމާފައިވާ ކަމަށް ވެސް ބަޔާނުގައިވެއެވެ. އަދި އެދައުވާގައި ބައިވެރިވާން ބޭނުންވާ ފަރާތްތަކުން 10 ދުވަސް ތެރޭގައި އެކަން އީމެއިލް މެދުވެރިކޮށް އެންގުމަށް އެފާމުން އެދިފައިވެއެވެ.
