ސްކޫލްތަކުގެ ޔުނިފޯމް ކަނޑާ ފޮތި ބެލެނިވެރިން ބޭނުން ފިހާރައަކުން ގަތުމުގެ ހުއްދަ އެޑިޔުކޭޝަން މިނިސްޓްރީން ދީފިއެވެ.
އެޑިޔުކޭޝަން މިނިސްޓްރީގެ މީޑިއާ އޮފިޝަލް ވިދާޅުވީ ފޮތި ގެންނަން އެއްބަސްވުން ހަދާފައިވާ ފަރާތްތަކުން އެއްބަސްވުމާއި އެއްގޮތަށް ފޮތި އެތެރެކޮށްފައި ނުވާތީ އެއްބަސްވުންތައް ބާޠިލުކުރުމަށް މަޝްވަރާކުރަމުން ގެންދާ ކަމަށެވެ.
ބައެއް ބެލެނިވެރިން ބުނީ ވަކިތަނަކުން ނޫނީ ނުގަންނަން އިސްކަންދަރު ސްކޫލުން މަޖުބޫރުކޮށްފައިވާ ކަމަށާއި ޤަބޫލުކުރެވެނީ މިއީ އެތަންތަނާއި ކޮންމެވެސް ބައަކާއި ގުޅިގެން ހިންގާ ކޮރަޕްޝަނުގެ ބޮޑު ޖަރީމާއެއް ކަމަށެވެ. އިތުރު ބެލެނިވެރިއަކު ބުނީ ވަކި ފިހާރައަކަށް އެތެރެކުރާ ފޮތިން ޔުނިފޯމް ލެއްވީމާ ދަރިން ކިޔެވުމަށް މޮޅުވާނެ ކަމަށް ބަލައި ދަރިންނަށް އޭ ޕްލަސް ހޯދައި ދޭން ބޭނުންވާތީ އެއްވެސް ޝަކުވާއެއް ކުރަން ބޭނުން ނޫން ކަމަށެވެ.
"މިގޭމް ކުޅެންވެގެން ޔުނިފޯމުގެ ކުލަ މިބަދަލުކުރަނީ. ދެން އެކުލައިގެ ފޮތި އެބުނާ ފިހާރައެއްގަ ނޫނީ ހުންނަ ކަމަކަށް ނުވޭ. ހުދު ފޮތިން ޔުނިފޯމް ލެއްވީމާ އެ ކަޓު ނުޖެއްސޭނެތީ ކޮންމެ ސްކޫލަކަށް ކުލައަކާ ޑިޒައިނެއް މިހަދަނީ." ކަމަށްވެސް ބައެއް ބެލެނިވެރިން ބުނެފައިވއެވެ.
އިސްކަންދަރު ސްކުލުގެ ދަރިވަރުންގެ ޕީއޭ ޔުނިފޯމް ފަހާފައިވާ ފޮތީގެ ފެންވަރު ދަށްކަމާއި ބޭނުންވާ ސައިޒު ނުލިބޭކަން ވެސް ބެލެނިވެރިން ފާހަގަ ކުރެއެވެ. "ޝަކުވާ ކުރީމަ ބުނަނީ ކަލޭމެން ހެޔޮވަރުކޮށްލާށޭ. އެމީހުން އަތުން ގަންނެގެން އަދި އަހަރެމެންނަށް މިޖެހެނީ އަގުދީގެން ހެޔޮވަރުކުރަން. ކީއްކުރާނީ ކޮންމެ ހާލެއްގައިވެސް ކުދިންނަށް އެބަ ކިޔަވައިދޭންޖެހޭ."
