ވެސްޓްޕާކާ ދިމާލުގައި ހަލާކުވެފައި އޮތްކަނބާއައިސާރަނި ހިނގުން މަރާމާތު ކުރުމުގެ މަސައްކަތް ފަށައިފިއެވެ. މި މަގު މަރާމާތުކުރުމުގެ މަސައްކަތް މާލޭ ސިޓީ ކައުންސިލުން ފަށާފައިވަނީ މިއަދުހެނދުނު އެވެ.
މަގު މަރާމާތު ކުރަން ފަށާފައި ވާއިރު، މިހާރު ކުރިއަށްދަނީ އެމަގުގައި އަތުރާފައިހުރި ގާތައްނެގުމުގެ މަސައްކަތެވެ. އަދި އެމަގު ހަދަން ފެށުމުގެކުރިން ސިޓީކައުންސިލުން މާލޭގައި ކުލަފޮހެވިފައިހުރި ސްޕީޑްބްރޭކަރު ތަކާއި ކަފިހުރަސްތަކުގައި އަލުން ރީނދޫކުލަ ލުމުގެ މަސައްކަތް ވަނީ ފަށާފައެވެ.
ރައީސް އިބްރާހިމް މުހައްމަދު ޞާލިޙް ވެރިކަމާ ހަވާލުވިތާ ކުޑަ ދުވްސްކޮޅެއް ފަހުން، ސިޓީކައުންސިލުން ވަނީ މާލޭގެ މަގުތައް މަރާމާތުކުރުމުގެ މަސައްކަތައް ފަށާފައެވެ. އެގޮތުން ބްލޮކުވެފައިވާ ކާނުތައް ސާފުކުރުމާއި، މަގުތަކުގައި ހެދިފައިވާ އަޑި ގުޑުންތައް އެއްވަރު ކުރުމުގެ މަސައްކަތް ބާރު ސްޕީޑުގައި ކުރިއަށް ދާކަން ފާހަގަކޮށްލަމެވެ.
ތޮއްޖެހިފައިވާ މާލޭގެ މަގުތަކަކީ އަބަދުހެން މަރާމާތު ކުރަންޖެހޭ މަގުތަކަކަށް ވެފައިވާ ކަމީ އެއްވެސް މީހަކަށް ދެބަސްވެވެން ނެތް ހަގީގަތެކެވެ. އެހެން ކަމުން މަގު ބެލެހެއްޓުމުގެ މަސައްކަތް ހަވާލުވެފައިވާ ފަރާތްތަކުން ޒިންމާދާރު ބަޔަކަށް ވުމަކީ މުހިއްމު ކަމެކެވެ.
