ނޫސްވެރިކަމާއި ނުލާ ސަރުކާރެއް އޮތުމަށްވުރެ ސަރުކާރަކާއި ނުލާ ނޫސްވެރިކަމެއް އޮތުން ވެސް ރައްޔިތުންގެ ޙައްޤުތައް ކަށަވަރުކޮށް ދެއްވުމަށްޓަކައި މާމުހިންމު ކަމަށް ރައީސް އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ދިވެހި ނޫސްވެރިކަމަށް 75 އަހަރު ފުރޭ އަލިމަސް ޔޫބީލް ފާހަގަކުރުމަށާއި ނޫސްވެރިކަމުގެ ޤައުމީ އިނާމުދިނުމަށް މިރޭ ދަރުބާރުގޭގައި ބޭއްވި ރަސްމިއްޔާތު ޝަރަފުވެރިކޮށްދެއްވައި ވާހަކަފުޅު ދައްކަވަމުން ރައީސް އިބްރާހީމް މުޙައްމަދު ޞާލިޙް ވިދާޅުވީ މިސަރުކާރު ދެމިއޮންނާނީ ނޫސްވެރިންނާއިއެކުގައި ކަމަށެވެ. އަދި ނޫސްވެރިކަމަށް ދެއްވެން ހުރި ހުރިހާ އެއްބާރުލުމެއް ދެއްވަމުން ގެންދަވާނެ ކަމަށެވެ.
ރައީސް އިބްރާހީމް މުޙައްމަދު ޞާލިޙް ވިދާޅުވީ ވަޒީފާއެއްގެ ގޮތުން އެމަނިކުފާނު އަދާކުރެއްވި ވަޒީފާއަކީވެސް ނޫސްވެރިކަމުގެ ވަޒީފާ ކަމަށެވެ. "ނޫސްވެރިންނާ ބައްދަލުވުމުން އަޅުގަނޑަށް ކުރެވެނީ ވަރަށް ފުން އިހްޞާޞްތަކެއް. އެއީ އެތައް ދުވަހެއް ވަންދެން ދުރުގައި އުޅުމަށްފަހު އަލުން އެނބުރި އަމިއްލަ ޢާއިލާ އާ ބައްދަލުކުރެވޭ ކަމުގެ އުފާވެރި އިޙްޞާޞްތައް. މިވަގުތު ދުރުގައި ހުންނަން ޖެހުނަސް އަޅުގަނޑަކީ ހަމަ ތިއަ ޢާއިލާގެ މެންބަރެއް. ވަޒީފާގެ ދުނިޔެއަށް އަޅުގަނޑު ނޭވާލާން ފެށީ ނޫސްވެރިކަމުގެ ދާއިރާއިން. ޚަބަރާ ރިޕޯޓް ލިޔުމާ ބޭރުގެ ޚަބަރުތައް ތަރުޖަމާ ކުރުމަކީ ވަޒީފާއެއްގެ ގޮތުން އަޅުގަނޑު ކުރި ފުރަތަމަ މަސައްކަތް. އެއީ އޭރުގެ ތިވީ މޯލްޑިވްސްގަ."
ރައީސް އިބްރާހީމް މުޙައްމަދު ޞާލިޙް ވިދާޅުވީ ނޫސްވެރިކަމުގެ މިނިވަންކަމަށް ހަށިފޮޅާލާފައި ނުކުތް ސަންގު ނޫހުގެ އެޑިޓަރުކަން ކުރެއްވެވުނުކަން އެއީ ވެސް ނޫސްވެރިކަމުގެ މިނިވަންކަމުގެ މުހިންމުކަން އިޙްޞާޞް ކުރެއްވެވުނު ސަބަބެއް ކަމަށެވެ. އަދި ސަރުކާރު ޒިންމަދާރު ކުރުވުމުގައި ނޫސްވެރިކަމުގެ ދައުރު ދެނެގަނެވުނު ވަރަށް އުފާވެރި ތަޖުރިބާއެއް ކަމަށެވެ. "އެއިގެ ފަހުން ނުކުތް މިނިވަން ނޫހުގެ ހިއްޞާދާރެއްގެ ގޮތުގައި އަޅުގަނޑު ހިމެނުނުކަން އެއީ ދިވެހި ނޫސްވެރިކަމާއި އަޅުގަނޑަށް ވަކިނުވެވުނު ކަމުގެ ހެއްކެއް. އެންމެ ފަހުން ރައީސުލްޖުމްހޫރިއްޔާ ކަމަށް ކުރިމަތިލުމަށްޓަކައި ފޯމް ފުރަންދެން އަޅުގަނޑު ހުރީ އެ މަސައްކަތުގަ."
ރައީސް އިބްރާހީމް މުޙައްމަދު ޞާލިޙް ވިދާޅުވީ މިފަދަ ސަބަބުތަކަށްޓަކައި ނޫސްވެރިކަމަށް އެމަނިކުފާނުގެ ހިތްޕުޅުގައި އޮތީ ވަރަށް މަތިވެރި ޤަދަރަކާއި ޝަރަފެއް ކަމަށެވެ. އަދި އެކަން އަބަދުވެސް އެގޮތުގައި ދެމިއޮންނާނެ ކަމަށެވެ.
ރައީސް އިބްރާހީމް މުޙައްމަދު ޞާލިޙް ވިދާޅުވީ ރާއްޖޭގެ ދުސްތޫރީ ހަޔާތް ފެށިގެން އައީވެސް ނޫސްވެރިކަމަށް މިނިވަންކަން ދެމުން ކަމަށެވެ. އެގޮތުން 1932 ވަނަ އަހަރު ފާސްކުރި ފުރަތަމަ ޤާނޫނު އަސާސީގައިވެސް ބުނެފައި އޮންނަނީ ޝަރީއަތާއި ޤާނޫނާއި ޚިލާފްނުވާގޮތުން މީސްތަކުންގެ ބުއްދިއަށް ފެންނަ ކަންކަން ދުލާއި ގަލަމުން ފައުޅުކުރުމަކީ ހުއްދަވެގެންވާ ކަމެއް ކަމަށެވެ.
"އެދުވަހުން ފެށިގެން ރާއްޖޭގެ ދުސްތޫރީ ނިޒާމުގައި އަބަދުވެސް ޚިޔާލު ފައުޅުކުރުމަށާއި ނޫސްވެރިކަމަށް ޖާގަ ދީފައި އޮވޭ. މިނިވަން ނޫސްވެރިކަމެއް ކުރުމަށް ޤާނުނީ އެއްވެސް ހުރަހެއް އެއްވެސް އިރަކު ނެތް. ނަމަވެސް ވެރިކަމުގެ ނިޒާމަށް ފާޑުކިޔައި ނެރުނު ކޮންމެ ނޫސްމަޖައްލާއަކަށް މަޖުބޫރުވީ އެއިގެ އެނމެ ޅަފަތުގައި ދުނިޔެ ދޫކުރަން. ނޫސްވެރިންނާ ބައްދަލުކުރީ ޖަލުގެ އަނދިރިކަން."
ރައީސް އިބްރާހީމް މުޙައްމަދު ޞާލިޙް ވިދާޅުވީ ދިވެހި ނޫސްވެރިކަމަށް 75 އަހަރު ފުރިގެންދާއިރު އެއިގެ ތެރެއިން 75 އަހަރު ފާއިތުވެގެންދިއައިރު ދިވެހި ނޫސްވެރިކަން އޮތީ ސަރުކާރު ކޮންޓްރޯލްކުރާ އެއްޗެއްގެ ގޮތުގައި ކަމަށެވެ. މިނިވަން ނޫސްވެރިކަމެއްގެ ބަދަލުގައި ސަރުކާރުން ބުނަން ބޭނުންވި އެއްޗެއް ބުނަން ބޭނުންވި ގޮތެއްގައި ރައްޔިތުންގެ ކަންފަތަށް އިއްވައިދޭ ވަސީލަތެއްގެ ގޮތުގައި ކަމަށެވެ.
