ރަސްމާލެ ތަރައްޤީ ކުރުމުގެ މަޝްރޫޢުން އެޑްވާންސްގެ ގޮތުގައި ލިބޭ އަދަދަކީ ރާއްޖޭގައި މީގެ ކުރިން ބޭރުގެ ބަޔަކާއި ހަވާލުކޮށްގެން ކުރިއަށް ގެންދިޔަ މަޝްރޫޢުތަކަށް ވުރެ ބޮޑު އަދަދެއް ކަމަށް ބިނާރާއި ގެދޮރުވެރިކަމާއި އުމްރާނީ ތަަރައްޤީއާ ބެހޭ ވަޒީރު ޑރ. ޢަބްދުﷲ މުއްޠަލިބު ވިދާޅުވެއްޖެއެވެ.
ވަޒީރު މިހެން ވިދާޅުވީ ރަސްމާލެ ތަރައްޤީ ކުރުމުގެ މަޝްރޫޢާ ގުޅިގެން ސިޔާސީ ބައެއް ފަރާތްތަކުން ފާޅުކުރެއްވި ކަންބޮޑުވުންތަކަށް ރައްދު ދެއްވަމުންނެވެ.
މިކަމާ ގުޅޭގޮތުން ދައުލަތުގެމީޑިއާއަށް މައުލުމާތު ދެއްވަމުން ވަޒީރު ޑރ. އަބްދުﷲ މުއްޠަލިބު ވިދާޅުވީ، މި މަޝްރޫޢުގެ ދަށުން އާންމު އުސޫލުން ނަގުދު ފައިސާގެ ގޮތުގައި ފައިސާ ނުލިބުނު ނަމަވެސް، ރަސްމާލޭގެ އަސްލު މަޝްރޫޢު ފެށުމުގެ ކުރިން އެޑްވާންސްގެ ގޮތުގައި ބޯހިޔާވަހިކަމުގެ ބޮޑު މަޝްރޫޢެއް ފެށިގެން ކުރިއަށްދާނެ ކަމަށެވެ.
އެގޮތުން އީގަލް ހިލްސްއާއެކު މިވަގުތު ސޮއިކޮށްފައިވާ ކޮމާޝަލް ޓަރމްސް އެގްރީމެންޓުގެ ދަށުން، 5,000 ހައުސިންގ ޔުނިޓުގެ ބޯހިޔާވަހިކަމުގެ މަޝްރޫޢެއް ރަސްމާލެ ތަރައްޤީ ކުރުމުގެ އެޑްވާންސްގެ ގޮތުގައި ކުރިއަށް ގެންދާނެ ކަމަށް ވަޒީރު ވިދާޅުވިއެވެ. މިއީ 500 މިލިޔަން ޑޮލަރު (7.7 ބިލިޔަން ރުފިޔާ) އާ ގާތްކުރާ ބޯހިޔާވަހިކަމުގެ މަޝްރޫޢެކެވެ.
މީގެ ކުރިން ހިންގާފައިވާ ބޮޑެތި މަޝްރޫޢުތަކާ އަޅާބައްލަވަމުން ވަޒީރު ވިދާޅުވީ، "އެކުއިޒިޝަން ކޮސްޓްގެ ގޮތުގައި މިސާލަކަށް ޖީއެމްއާރަށް އެއަރޕޯޓު ދީގެން ލިބުނީ 78 މިލިޔަން ޑޮލަރު. އެނބޫދޫ ފަޅު ދީގެން އެކުއިޒިޝަން ކޯސްޓުގެ ގޮތުގައި ލިބުނީ 40 މިލިޔަން ޑޮލަރު. އެއާއި ގުޅުވައި ބަލާނަމަ އެތައް ގުނައެއް ބޮޑު އަދަދެއް މި ލިބިގެންދިޔައީ." ކަމަށެވެ.
ވަޒީރު އިތުރަށް ފާހަގަކުރެއްވި ގޮތުގައި، އެޑްވާންސް ފައިސާ ނުލިބޭ ކަމަށް ބުނެ ދެކެވޭ ވާހަކަތަކަކީ ޙަޤީޤަތެއް ނޫނެވެ. ކޭޝްގެ ގޮތުގައި ނުލިބުނު ކަމުގައިވިޔަސް، ދިވެހި ރައްޔިތުންނަށް ސީދާ މަންފާވާގޮތަށް ބޯހިޔާވަހިކަމުގެ މަޝްރޫޢެއް ހިންގުމަށްޓަކައި، އެ ފަރާތްތަކުގެ އަމިއްލަ ޕްރޮޖެކްޓުން ފައިސާ ލިބުމުގެ ކުރިން 500 މިލިޔަން ޑޮލަރަށްވާ ޕްރޮޖެކްޓް ހިންގައިދިނުމަށް އެއްބަސްވެފައިވާކަން ވަޒީރު ފާހަގަކުރެއްވިއެވެ.
