މަސްތުވާތަކެތި ވިއްކައި، އެތަކެތި ބޭނުންކުރުމަށް ރާއްޖޭގެ އެކި ރަށްރަށުގައި "ކެފޭ" ތަކުގެ ގޮތުގައި ހިންގަމުންދިޔަ ތަންތަން ހުއްޓުވުމަށް ކުރަމުންދާ މަސައްކަތުގެ ދަށުން، މިހާތަނަށް މުޅި ރާއްޖެއިން 17 ތަނެއް ބަންދުކޮށްފިއެވެ.
މިކަން ހާމަކުރެއްވީ މިދިޔަ އާދީއްތަ ދުވަހުގެ ރޭ ބޭއްވި "އަހާ" ފޯރަމުގައި، މަސްތުވާތަކެއްޗާ ގުޅޭގޮތުން އާންމުންގެ ފަރާތުން ހުށަހެޅި ސުވާލުތަކަށް ޖަވާބުދެއްވަމުން ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާބެހޭ ވަޒީރު ޢަލީ އިޙްސާނެވެ.
ވަޒީރު އިޙްސާން ވިދާޅުވީ، ޤާނޫނަށް ގެނެވުނު އިސްލާހުތަކާއެކު ފެށި މި އޮޕަރޭޝަނުގެ ދަށުން ބަންދުކުރެވުނު 17 ތަނުގެ ތެރޭގައި މާލޭގެ 12 ތަނަކާއި، އައްޑޫ ސިޓީގެ 4 ތަނެއްގެ އިތުރުން ފުވައްމުލައް ސިޓީގެ ތަނެއް ހިމެނޭ ކަމަށެވެ.
މީގެއިތުރުން، މަސްތުވާތަކެތި އެތެރެކޮށް އެއިން މަންފާ ހޯދާ ފަރާތްތައް ހުއްޓުވުމަށް ކުރެވޭ މަސައްކަތުގެ ތެރެއިން މުޅި ރާއްޖެއިން 24 ނެޓްވޯކެއް ދެނެގަނެވިފައިވާކަން ވަޒީރު ފާހަގަކުރެއްވިއެވެ. އޭގެ ތެރެއިން 3 ނެޓްވޯކެއްގެ މައްސަލަ ބަލައި، ކޯޓު މަރުހަލާގައި އޮތްއިރު، އެ މައްސަލަތަކާ ގުޅިގެން 3.6 މިލިއަން ރުފިޔާއާއި 148,000 އެމެރިކާ ޑޮލަރުގެ ނަގުދު ފައިސާގެ އިތުރުން ގިނަ އަދަދެއްގެ މުދާވެސް ވަނީ އަތުލައިގަނެވިފައެވެ.
"އަޅުގަނޑުމެން ކުރީގައި ބަލަނީ ޑްރަގްސް އޮންނަ ކުއްޖާ ނަގާފައި ޖަލަށްލެވޭތޯ. އޭގެ ބަދަލުގައި މި ސަރުކާރުގެ ވިސްނުމަކީ ޑްރަގް ރާއްޖެއަށް އެތެރެކޮށް އޭގެ ވިޔަފާރިކުރާ ނެޓްވޯކްތައް ނައްތާލައި އެ މީހުންގެ ވިޔަފާރިތަކުން ހޯދާފައިވާ ފައިދާ ދައުލަތަށް ނަގައި، އެ މީހުން ހޯދާފައިވާ މުދަލެއް ވެއްޖެއްޔާ އެވެސް ދައުލަތަށް ނެގުން. ޑްރަގް ވިއްކައިގެން، ދިވެހިރާއްޖޭގެ ރައްޔިތުން ހާލުގައި ޖައްސާފައި ކުރެވޭނެ ވިޔަފާރިއެއް ދެން ރާއްޖޭގައި ނޯންނާނެ،" ވަޒީރު އިޙްސާން ވިދާޅުވިއެވެ.
