ލޭ ހޯދުމުގައި ދިމާވާ ދަތިތަކަށް ލުއިފަސޭހަ ޙައްލެއް ހޯދައިދިނުމުގެ ގޮތުން، ލޭ ދޭން ބޭނުންވާ މީހާ ހުރި ތަނަކަށް ގޮސް ލޭ ނެގޭނެ މޮބައިލް ޚިދުމަތެއް ވަރަށް އަވަހަށް ފެށުމަށް ތައްޔާރުވަމުންދާކަމަށް ސިއްޙަތާއި އާއިލާއާއި އިޖުތިމާޢީ އެހީއާ ބެހޭ ވަޒީރު ޤީލާ ޢަލީ ވިދާޅުވެއްޖެއެވެ.
ވަޒީރު ޤީލާ ޢަލީ ވިދާޅުވީ، މިހާރު އެންމެ ބޮޑު ގޮންޖެހުމަކީ ލޭ ދޭނެ މީހުން ހޯދުމުގައި ދިމާވާ ދަތިތައް ކަމަށެވެ. އަދި ލޭ ދޭނެ މީހުން ލިބޭ ޙާލަތްތަކުގައިވެސް، ލޭ ދިނުމުގެ ޝަރުތުތައް ހަމަނުވުމުގެ ސަބަބުން ބައެއް މީހުންނަށް ލޭ ނުދެވޭ ގޮތް ވާކަން ވަޒީރު ފާހަގަކުރެއްވިއެވެ.
މީގެ އިތުރުން، ވަގުތުގެ ދަތިކަން ހުރުމުގެ ސަބަބުން ލޭ ދިނުމަށް ޚާއްޞަ ސެންޓަރުތަކަށް ދިއުމަކީ ބައެއް މީހުންނަށް އުނދަގޫ ކަމެއްކަން ފާހަގަކުރައްވަމުން ވަޒީރު ވިދާޅުވީ، އަލަށް ތަޢާރަފުކުރާ މޮބައިލް ޚިދުމަތާއެކު މިކަމަށް ބޮޑު ލުޔެއް ލިބިގެންދާނެ ކަމަށެވެ.
"ލޭ ދޭން ބޭނުންވާ މީހުންނަށް ލުއިފަސޭހަކުރުމަށް ހަމަޖައްސާ ޚިދުމަތެއް މިއީ. ލޭ ދޭ މީހާ ގާތަށް ގޮސް، ލޭ ނެގޭނެ މޮބައިލް ޚިދުމަތެއް މިއީ. އޭރުން ލޭ ނަގާ، ފެސިލިޓީތަކަށް ގެންގޮސް އެ ލޭ ރައްކާކުރެވޭނެ،" ވަޒީރު ވިދާޅުވިއެވެ.
ރާއްޖޭގައި ލޭ ލިބުމުގެ ދަތިކަން ޙައްލުކުރުމަށްޓަކައި، ލޭ ރައްކާކުރެވޭނެ 4 ސްޓޯރޭޖް ފެސިލިޓީ (ބްލަޑް ބޭންކް) އަތޮޅުތަކުގައި މިހާރުވެސް ޤާއިމުކޮށްފައިވާކަން ވަޒީރު ފާހަގަކުރެއްވިއެވެ. އަދި ލޭގެ ދަތިކަމެއް ނުއައިސް ދެމެހެއްޓެނިވި ގޮތެއްގައި ލޭ ލިބެން ހުންނާނީ ލޭ ދޭ މީހުންގެ އަދަދު އިތުރުކުރެވިގެން ކަމަށްވެސް ވަޒީރު ވިދާޅުވިއެވެ.
