ގެއްލިފައިވާ މިނިވަން ނޫހުގެ ނޫސްވެރިޔާ އަހުމަދު ރިޟްވާން އާއި ރަހުމު ކުޑަ ގޮތަކަށް މަރާލި ބްލޮގަރ ޔާމީން ރަޝީދުގެ ވާހަކަ ދައްކަވަން ފެށި ހިސާބުން، ރައީސް އިބްރާހިމް މުޙައްމަދު ޞާލިޙަށް ކީރިތި ކުރެއްވިއްޖެއެވެ.
ނޫވެރިކަމުގެ އަލިމަސް ޔޫބީލް ފާހަގަ ކުރެއްވުމުގެ ރަސްމިއްޔާތުގައި، ނޫސްވެރިކަމާއި ގުޅޭ ގޮތުން ވާހަކަފުޅު ދައްކަވަމުން، ރިޟުވާނާއި އަދި ޔާމީނު ރަޝީދުގެ ވާހަކަފުޅު ފެއްޓެވި ހިސާބުން ކީރިތި ކުރެއްވި، އެވާހަކަފުޅު ކުރިޔަށް އިތުރަށް ނުގެންދެވިގެން އެމަނިކުފާނު އިރުކޮޅަކަށް ވާހަކަފުޅު ދެއްކެވުން މެދުކަނޑާ ވެސް ލެއްވިއެވެ. ނަމަވެސް ފަހުންވެސް ވާހަކަފުޅު ދެއްކެވީ ކުރެހިފައިވާ އަޑުފުޅަކުންނެވެ.
"ނޫސްވެރިކަމުގެ އަލިމަސް ޔޫބީލް ފާހަގަކުރާއިރު އަޅުގަނޑުމެންނާއި އަލްވަދާޢު ކިޔާފައިވާ، ދެ ނޫސްވެރިއެއްގެ ހަނދާން މިއަދު އައުކުރަން އެބަޖެހޭ. އެއީ ވީނުވީއެއް ނޭނގި ގެއްލުވާލާފައިވާ މިނިވަން ނޫހުގެ ނޫސްވެރިޔާ އަހުމަދު ރިޟުވާން. އަދި ވަރަށް އަނިޔާވެރި ގޮތަކަށް މަރާލާފައިވާ ބްލޮގަރު ޔާމީނު ރަޝީދު. އެ ދެނޫސްވެރިން އަޅުގަނޑުމެންނާއި ވަކި ވުމަކީ ދިވެހި ނޫސްވެރިންގެ އާއިލާއަށް ލިބުނު ވަރަށް ބޮޑު ހިތާމައެއް ހިތްދަތި ކަމެއް." ރައީސް އިބުރާހިމް މުހައްމަދު ޞާލިޙް ވިދާޅުވިއެެވެ.
ރައީސް ޞާލިޙް މިރޭ ވެސް ވިދާޅުވީ، އެ ދެމައްސަލަ އަކީ އެމަނިކުފާނުގެ ސަރުކާރުން އަޅައި ނުލަައި ދޫކޮށްލައްވާނެ ދެ މައްސަލައެއް ނޫން ކަމަށާއި އެމައްސަލަތަކުގައި އެންމެ ފުނަށް ގޮސް އެކަމުގައި ބައިވެރިވި ފަރާތްތައް ހޯއްދަވާނެ ކަމަށެވެ.
