ރާއްޖޭގެ ނޫސްވެރިކަމަށް ގިނަ ޚިދުމަތްތަކެއް ކޮށްދެއްވާފައިވާ ލިޔުންތެރިޔާ އަދި ދިވެހި ބަހުގެ ލާމަސީލު މުދައްރިސް އަބްދުﷲ ސޯދިގު (ސޯދުބެ)، ނޫސްވެރިކަމުގެ ލައިފްޓައިމް އެޗީވްމެންޓް އެވޯޑް މިރޭ ހާސިލްކުރައްވައިފަ އެވެ.
ރާއްޖޭގެ ނޫސްވެރިކަމަށް 75 އަހަރު ފުރުމުގެ އަލިމަސްޔޫބީލް ފާހަގަ ކުރުމަށާއި 2017 ވަނަ އަހަރުގެ އެންމެ މޮޅު ނޫސްވެރިކަމުގެ އިނާމު ދިނުމަށް މޯލްޑިވްސް މީޑިއާ ކައުންސިލާއި ހޯމް މިނިސްޓްރީ ގުޅިގެން މިރޭ ބޭއްވި ޚާއްސަ ޚަފްލާގައި ސޯދުބެއަށް ލައިފްޓައިމް އެޗީވްމެންޓް އެވޯޑް އެރުވީ، ދިވެހި ނޫސްވެރިކަމަށް އޭނާ ކޮށްދެއްވާފައިވާ ޚިދުމަތްތަކުގެ އަގުވަޒަންކުރުމުގެ ގޮތުންނެވެ.
ސޯދުބެގެ ނޫސްވެރިކަމުގެ ޙަޔާތުގައި އޭނާވަނީ، "ހަވީރު" ނޫހުގެ ފުރަތަމަ އެޑިޓަރުކަމާއި، ޓީވީ މޯލްޑިވްސް އާއި ދިވެހިރާއްޖޭގެ އަޑުގެ ނިއުސްރޫމްތަކުގެ އިތުރުން ރާއްޖޭގެ ފުރަތަމަ ނޫސް ސަރުކާރުގެ ޚަބަރުގެ ނޫސްވެރިއެއްގެ ގޮތުގަ އާއި، ވިޔަފާރި މިއަދު އަދި މޫންލައިޓް ފަދަ ނޫސްތަކުގައި ވެސް މަސައްކަތް ކުރައްވައިފަ އެވެ.
ނޫސްވެރިކަމުގެ އިނާމުތައް މިދިޔަ އަހަރު ހާސިލްކުރި ނޫސްވެރިންނަށް ވެސް މިރޭގެ ޚަފްލާގައި ވަނީ އެވޯޑް ދީފަ އެވެ.
· އެގޮތުން، ފީޗާ ޚަބަރު ލިޔުމުގެ ދާއިރާ އިން މިދިޔަ އަހަރުގެ އެންމެ މޮޅު ނޫސްވެރިޔަކީ "މިހާރު" ނޫހުގެ އާމިނަތު ޝިފްލީން އެވެ. އެ އެވޯޑަށް "މިހާރު"ގެ އާސިމާ ނިޒާރު އަދި އާސިޔަތު މުހައްމަދު ސައީދު ވެސް ވާދަކުރި އެވެ.
· ސިޔާސީ ދާއިރާ އިން އެންމެ މޮޅު ނޫސްވެރިޔަކީ "އަވަސް" އޮންލައިންގެ މޫސާ ރަޝީދެވެ. އެ ބައިން "މިހާރު" ނޫހުގެ ފަޒީނާ އަހުމަދާއި "އަވަސް"ގެ ނާޒިމް ހަސަން ވެސް ނޮމިނޭޓްވެފައިވެ އެވެ.
· ކުޅިވަރުގެ ދާއިރާ އިން އެންމެ މޮޅު ނޫސްވެރިޔާކަމުގެ އިނާމު ހާސިލް ކޮށްފައިވަނީ ދެ ނޫސްވެރިއެކެވެ. އެއީ "މިހާރު"ގެ އައްޒާމް އަލިފުޅާއި "އަވަސް"ގެ ހުސެން ހަބީބު އެވެ.
· ވިޔަފާރި އާއި އިގްތިސާދުގެ ދާއިރާ އިން މިދިޔަ އަހަރުގެ އެންމެ މޮޅު ނޫސްވެރިޔަކީ "މިހާރު"ގެ އަބްދުﷲ ޖަމީލް އެވެ. އެ އެވޯޑަށް ރާއްޖެ އެމްވީގެ ފާތުމަތު ޝަނާ މުހައްމަދާއި އިތުރު ނޫސްވެރިޔަކު ވެސް ވާދަކުރި އެވެ.
· ޝަރުއީ އަދި ގާނޫނީ ދާއިރާ އިން އެންމެ މޮޅު ނޫސްވެރިޔަކީ "މިހާރު"ގެ މުއިއްޒު އިބުރާހީމް އެވެ. އެ ބައިން އޭނާއާ ވާދަކުރީ "އަވަސް"ގެ ނާޒިމް ހަސަން އެވެ.
· އިޖުތިމާއީ ދާއިރާ އިން އެންމެ މޮޅު ނޫސްވެރިޔާގެ އެވޯޑް ހާސިލްކުރީ "މިހާރު"ގެ އަހުމަދު ސާއިލް އަލީ އެވެ .އެބައިން "މިހާރު"ގެ އާމިނަތު ޝިފްލީން އާއި "އަވަސް"ގެ މޫސާ ރަޝީދު ވެސް ނޮމިނޭޓްވެފައިވެ އެވެ.
· ވީޑިއޯ ޖާނަލިޒަމް އެވޯޑް ހާސިލްކުރީ ޗެނަލް 13ގެ އާމިނަތު ލަޔާލް މަނިކެވެ.
· ފޮޓޯ ޖާނަލިޒަމްގެ ދާއިރާ އިން މިދިޔަ އަހަރުގެ އެންމެ މޮޅު ނޫސްވެރިޔަކީ ރާއްޖެ އެމްވީގެ މުހައްމަދު ޝަރުހާން ވަހީދެވެ.
· މިދިޔަ އަހަރުގެ އެންމެ އުއްމީދީ ނޫސްވެރިޔާގެ އެވޯޑް ހާސިލްކޮށްފައިވަނީ އަވަސް އޮންލައިންގެ ނާޒިމް ހަސަން އެވެ.
