ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު، ޗީފް އޮފް ޑިފެންސް ފޯސްގެ މަގާމަށް ސިފައިންގެ ކުރީގެ ބްރިގޭޑިއާ ޖެނެރަލް އަބްދުﷲ ޝަމާލު އައްޔަން ކުރައްވައިފިއެވެ.
ޗީފް އޮފް ޑިފެންސް ފޯސްގެ މަގާމަށް ޝަމާލް އައްޔަން ކުރައްވާފައިވާއިރު، އެ މަގާމުގައި ހުންނެވި މޭޖަރ ޖެނެރަލް އަހުމަދު ޝިޔާމް ވަނީ އެމަގާމުން މިއަދުގެ ވަގުތެއްގައި ދުރުކޮށްފައެވެ.
ޝަމާލު އަކީ، 2013 ގައި ބޭއްވި ރިޔާސީ އިންތިހާބުގެ ދެވަނަ ބުރެއް ބޭއްވުމާ ގުޅޭގޮތުން ސުޕްރީމް ކޯޓުން ކުރި ހުކުމުގެ ބާރާއި އަމުރުވެރިކަން ނަފީކޮށް، ސިފައިންގެ ތެރޭގައި ފިތުނަ އުފެދޭ ގޮތަށް މަސައްކަތްކޮށް، މަސްލަހަތު ނަގާލަން އުޅުނު ކަމަށް ބުނެ އެ އަހަރުގެ ނޮވެމްބަރު މަހުގެ ތެރޭގައި ވަޒީފާއިން ވަކިކުރެއްވި ބޭފުޅެކެވެ.
ނަމަވެސް އޭނާ ސިފައިންގެ ވަޒީފާއިން ވަކިކުރީ ގާނޫނާ ހިލާފަށް ކަމަށް ކަނޑައަޅައި އޭނާއަށް އަލުން ވަޒީފާ ދޭން ހައި ކޯޓުން ވަނީ މިއަދު އަމުރުކޮށްފައެވެ.
ހައިކޯޓުން މިއަދު ކުރި ހުކުމުގައި ބުނެފައިވަނީ، ޝަމާލު ވަކިކޮށްފައިވަނީ އޭނާގެ މައްޗަށް ކުރެވިފައިވާ ތުހުމަތުތަކަކި ކޮބައިކަން ބަޔާން ކުރުމެއް ނެތި ކަމަށާއި ކުރާ ތުހުމަތުތަކާ ގުޅޭގޮތުން އެއްވެސް ވަރަކަށް އޭނާއާއި ސުވާލު ވެސް ކޮށްފައިނުވާ ކަމަށެވެ.
އެހެންކަމުން، އޭނާ ކުރިން ހުރި ފެންވަރުގެ ވަޒީފާއެއް 15 ދުވަސް ތެރޭގައި އަލުން ދިނުމަށް ހުކުމުގައި ބުނެފައިވެއެވެ. އަދި ވަކިކުރި ދުވަހުން ފެށިގެން ވަޒީފާ އަނބުރާ ދިނުމާއި ހަމައަށް ލިބެންޖެހޭ މުސާރަ އާއި އިނާޔަތްތައް ވެސް 30 ދުވަހުގެ ތެރޭގައި ޝަމާލަށް ދިނުމަށް ހުކުމުގައި އަންގާފައިވެއެވެ.
