ޗީފް އޮފް ޑިފެންސް ފޯސްގެ މަގާމުގައި ހުންނެވި މޭޖާ ޖެނެރަލް އަހްމަދު ޝިޔާމް މިއަދު އެ މަގާމުން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙު ވަކިކުރައްވައިފި އެވެ.
ރައީސް އޮފީހުން މިއަދު ނެރުނު އިއުލާނެއްގައި ބުނެފައިވަނީ ޤާނޫނު ނަންބަރު 2008/1 (ސިފައިންގެ ޤާނޫނު) ގެ 11 ވަނަ މާއްދާގެ (ނ) އިން ސިފައިންގެ އެންމެ މަތީ ވެރިޔާއަށް ލިބިދޭ ބާރުގެ ދަށުން، ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ، އިބްރާހީމް މުޙައްމަދު ޞާލިޙް، ޗީފް އޮފް ޑިފެންސް ފޯސްގެ މަގާމުން، މޭޖަރ ޖެނެރަލް އަޙްމަދު ޝިޔާމް މިއަދު ވަކިކުރައްވައިފި ކަމަށެވެ. އަދި ހަމަ އެހެންމެ، ސިފައިންގެ ޤާނޫނުގެ 12 ވަނަ މާއްދާގެ (ހ) އިން ރައީސުލްޖުމްހޫރިއްޔާއަށް ލިބިދޭ ބާރުގެ ދަށުން، ވައިސް ޗީފް އޮފް ޑިފެންސް ފޯސްގެ މަގާމުން ބްރިގޭޑިއަރ ޖެނެރަލް އަޙްމަދު ޝާހިދު ވެސް ވަނީ މަގާމުން ވަކިކުރައްވާފައެވެ.
ރައީސް އިބްރާހީމް މުހައްމަދު ސޯލިހް ވެރިކަމާ ހަވާލުވެވަޑައިގަތުމަށްފަހު އެންމެ ފުރަތަމަ މަގާމުން ވަކިކުރާނެ ކަމަށް ބެލެވުނު ބޭފުޅުންގެ ތެރޭގައި ޝިޔާމު ހިމެނެ އެވެ. ނަމަވެސް މިއަދާ ހަމައަށް އޭނާ މަގާމުން ވަކިކުރައްވާފައި ނުވާތީ އިސްލާހަށް މަސައްކަތް ކުރި ބައެއް ފަރާތްތަކުގެ ފާޑު ކިޔުން ރައީސްއަށް އަމާޒުވެގެން ގޮސްފައިވެ އެވެ.
