ސިފައިންގެ ކުރީގެ ބްރިގޭޑިއާ ޖެނެރަލް އަބްދުﷲ ޝަމާލު ވަޒީފާއިން ވަކި ކުރީ ގާނޫނާއި ހިލާފަށް ކަމަށް ކަނޑައަޅައި، އޭނާއަށް އަލުން އެ ވަޒީފާ ދިނުމަށް ހައިކޯޓުން ހުކުމް ކޮށްފިއެވެ.
ކުރީގެ ބްރިގޭޑިއާ ޖެނެރަލް ޝަމާލު ވަޒީފާއިން ވަކިކޮށްފައި ވަނީ ސިފައިންގެ ތެރޭގައި ބައިބައިވުން އުފެއްދުމަށް ލިއުމެއް އާއްމު ކުރި ކަމަށް ބުނެ 2013 ވަނަ އަހަރުގައެވެ. އެ މައްސަލަ ސިވިލް ކޯޓަށް ހުށަހެޅުމުން 2016 ވަނަ އަހަރު ހުކުމް ކޮށްފައި ވަނީ އޭނާ ވަޒީފާއިން ވަކިކުރީ ރަނގަޅަށް ކަމަށެވެ.
ނަމަވެސް މިއަދު އެމައްސަލައާއި ގުޅިގެން ހައިކޯޓުން ކުރި ހުކުމުގައި ވަނީ 15 ދުވަހުގެ ތެރޭގައި ޝަމާލަށް އަލުން ވަޒީފާ ދިނުމަށާއި، އޭނާ ވަޒީފާއިން ވަކިކުރި ދުވަހުން ފެށިގެން ވަޒީފާ ލިބުނު ދުވަހާއި ހަމައަށް މުސާރައާއި އިނާޔަތްތައް 30 ދުވަހުގެ ތެރޭގައި ދިނުމަށެވެ.
ހައިކޯޓުގެ ތިންފަނޑިޔާރުންގެ އިއްތިފާގުން މިއަދު ކުރި ހުކުމުގައި ވަނީ ސޯޝަލް މީޑިއާގައި އޭރު ދައުރުވި ލިއުމަކީ ޝަމާލު އާއްމު ކުރި ލިއުމެއްކަން ހުށަހެޅި ބަޔާންތަކާއި ސިއްރު ލިޔުންތަކުން އެނގެން ނެތް ކަމަށާއި އަދި އެފަދަ ކަމެއް ޝަމާލް ކުރި ކަން ދައުލަތަށް ކިޔައިދެވިފައި ނުވާ ކަމަށެވެ.
