ލާއިންސާނީ އަނިޔާ ކުރުމުގައި ފާއިތުވި 5 އަހަރަށް އެނބުރި ނުދާނެ ގޮތަކަށް ޤައުމުގެ ކަންކަން އިންތިޒާމުކުރަންޖެހޭ ރައީސް އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
އއ. ފެރިދޫ ރައްޔިތުންނާއި މުޚާޠަބް ކުރައްވައި ރައީސް އިބްރާހީމް މުޙައްމަދު ޞާލިޙް ވިދާޅުވީ ފާއިތުވި 5 އަހަރަކީ ރައްޔިތުންނަށް ލާއިންސާނީ އަނިޔާ ކުރުމުގައި ފާލުން ނެއްޓިގެން ދިއަ 5 އަހަރު ކަމަށެވެ.
"ރައްޔިތުންނަށް އިންޞާފު ލިބޭކަން ކަށަވަރު ކުރުމަކީ އަޅުގަނޑުގެ އެންމެ ބޮޑު އަމާޒު. އިންސާނީ ޙައްޤުތައް ކަށަވަރު ކޮށްދިނުމަކީ އަޅުގަނޑުގެ މަޤްޞަދު. މިކަންކަން ކުރުމުގައި ހުރި ކަންބޮޑުވުންތަކަށް ޙައްލު ހޯދަން މިގެންދަނީ މަސައްކަތް ކުރަމުން."
ބޭސްފަރުވާ ކުރުމަކީ ކޮންމެ ރައްޔިތަކަށްވެސް ލިބެންޖެހޭނެ އިންސާނީ ޙައްޤެއްކަން ބަޔާން ކުރައްވައި ރައީސް ޞާލިޙް ވިދާޅުވީ ރަށުގެ ޞިއްޙީ މަރުކަޒަކީ 16 ގަޑިއިރު ޚިދުމަތް ދޭ ތަނަކަށް ހެދުމަކީ ޚިދުމަތް ދެވުން ނޫން ކަމަށާއި ޚިދުމަތް ދެވޭނީ ވަސީލަތްތަކާއި ދޭންޖެހޭ ޚިދުމަތްތައް ހަމަކޮށްގެން ކަމަށެވެ.
"ޑޮކްޓަރަކާ ނަރުހަކު ހުރި ނަމަވެސް ލެބޯޓްރީއަކާ ނުލައި ޚިދުމަތް ދިނުމަކީ ވަރަށް ދަތިކަމެއް. އަޅުގަނޑުމެން ވެރިކަމާއި ޙަވާލުވެ މިތިބީ އެކަންކަން ފުރިހަމަކޮށްދޭން. މިރަށަށް ބޭނުންވާ ލެބޯޓްރީގެ ޚިދުމަތް ފަހިވެގެންދާނެ ކަމުގެ ޔަޤީންކަން އަރުވަން." ރައީސް ޞާލިޙް ވިދާޅުވިއެވެ.
