މޯލްޑިވްސް ކަރެކްޝަނަލް ސާވިސްގެ އިސް ވެރިންގެ ޝަރުތުތައް ބަދަލުކޮށް ޖަލުތަކާއި ޕޭރޯލް ގާނޫނަށް އިސްލާހުތަކެއް ގެނައުމުގެ ބިލް މަޖިލީހުން މިއަދު ބަލައިގެންފި އެވެ.
ސަރުކާރު ފަރާތުން ޖަލުތަކާއި ޕޭރޯލް ގާނޫނަށް އިސްލާހު ގެނައުމުގެ ބިލް މަޖިލިހަށް ހުށަހަޅާފައި ވަނީ ހެންވޭރު ދެކުނު ދާއިރާގެ މެންބަރު މުހައްމަދު އަބްދުލްކަރީމް އެވެ. މިއިސްލާހު ބަލައިގެންފައިވަނީ ވޯޓުގައި ބައިވެރިވި 46 މެންބަރުންގެ އިއްތިފާގުންނެވެ.
ޖަލުތަކާއި ޕޭރޯލް ގާނޫނުގައި މިހާރު އޮންނަ ގޮތުން ކަރެކްޝަންގެ އެންމެ އިސްވެރިޔާ ކޮމިޝަނާ އޮފް ޕްރިޒަން ނުވަތަ ޑެޕިއުޓީ ކޮމިޝަނާ އޮފް ޕްރިޒަންގެ މަގާމަށް އައްޔަން ކުރެވޭނީ ކަރެކްޝާންގެ ކޮމިޝަންޑް އޮފިސަރުންގެ ތެރެއިން އޮފިސަރެކެވެ. ނަމަވެސް އެ ގާނޫނަށް މިއަދު ގެނައި އިސްލާހުގައި ވަނީ އެ ބައި އުނިކޮށްފަ އެވެ.
އެހެންކަމުން މިހާރު ކޮމިޝަންޑް އޮފިސަރަކަށް ނުވިޔަސް މިނިސްޓަރުގެ ލަފާގެ މަތިން އެ މަގާމަށް އޮފިސަރަކު އައްޔަން ކުރެވިދާނެ އެވެ. އަދި އާންމު ޖަލުތަކާއި ރިމާންޑް ޖަލުތަކުގެ ޑިރެކްޓާ އޮފް ޕްރިޒަންސް މަގާމަށް މީހުން އައްޔަން ކުރުމުގައި ވެސް ހަމަ އެގޮތަށް އަމަލު ކުރަން ޖެހޭނެ ކަމަށް އެ ބިލުގައި ބުނެފައިވެ އެވެ.
