އެމަނިކުފާނުގެ ވެރިކަމުގައި ސަރުކާރަށް ފާޑުކިޔުމުގެ މިނިވަންކަން ރައްޔިތުންނަށް އޮންނާނެ ކަމަށާއި ވެރިކަން ކުރައްވާނީ ރައްޔިތުންގެ އަޑު އައްސަވައިގެން ކަމަށާއި އަހަރު ދުވަހުގެ ތެރޭ ބައިނަލްއަޤްވާމީ ފެންވަރުގައި އެކަމުގެ ކުރިއެރުން ދައްކަވާނެ ކަމަށް ރައީސް އިބްރާހީމް މުޙައްމަދު ޞާލިޙް ވިދާޅުވެއްޖެއެވެ. އއ އުކުޅަހުގައި ވާހަކަފުޅު ދައްކަވަމުން ރައީސް އިބްރާހީމް މުޙައްމަދު ޞާލިޙް މިއަދު ވިދާޅުވީ "އިރާދަ ކުރެއްވިއްޔާ ކުރިއަށް އޮތް އަހަރުގެ މިދުވަހު އަޅުގަނޑު ދައްކާ ވާހަކައިގަ ނޫސްވެރިކަމުގެ މިނިވަންކަމުގާ އަޅުގަނޑުމެންނަށް ކުރިއެރުން ލިބުނުކަމުގެ ވާހަކަ ދެއްކޭނެ. އަދި ޑިމޮކްރެޓިކް ހަމަތައް ހަރުދަނާވެ ފްރީޑަމް ހައުސް އާ ރިޕޯރޓަރސް ވިތްއައުޓް ބޯޑަރސް ރާއްޖެ އެތައް ދަރަޖައަކަށް ކުރިއަރާނެ." ކަމަށެވެ. "އިންސާނީ ޙައްޤުތަކާއިބެހޭ ޤައުމީ އޮނިގަނޑު ޔޫއެންޑީޕީގެ އެހީތެރިކަމާއިއެކު މިހާރު އަންނަނީ އެކުލަވަލެވެމުން ކަމަށާއި އެއީ މުހިންމު ކަމެއް ކަމަށެވެ.
"މިއޮނިގަނޑު ސަރުކާރުގެ އެކިއެކި މުއައްސަސާތަކާ މަޝްވަރާ ކުރުމަށްފަހު ތަންފީޒުކުރަން ފެށުމަކީ އިންސާނީ ޙައްޤުތައް ހިމާޔަތްކުރަން އެޅޭ މުހިންމު ފިޔަވަޅެއް." ރައީސް ޞާލިޙް ވިދާޅުވީ ތަރައްޤީ އާ ނުލައި ޞުލްޙަމަސަލަސްކަން ދެމިއެއް ނުއޮންނާނެ ކަމަށާއި އަދި ޞުލްޙަ މަސަލަސްކަންވެސް ތަރައްޤީ އާއި ނުލައި ދެމި ނުއޮނަނާނެ ކަމަށެވެ. ހަމައެފަދައިން ދާއިމީ ޞުލްޙަ ޢާއި ދެމެހެއްޓެނިވި ތަރައްޤީއަކީ އިންސާނިއްޔަތަށް ހުރުމަތްތެރިކޮށް ހިތައިގެން މެނުވީ ޙާޞިލު ކުރެވޭނެ ކަންކަން ނޫން ކަމަށެވެ. އަދި އެގޮތަށް ކަންތަތއްތައް ހަމަޖެހިފައި ނެތް ނަމަ އެވަނީ އިންސާނިއްޔަތަށް ޙުރުމަތްތެރިކޮށް ހިތުމުގައި އިހުމާލު ވެވިފައި ކަމަށެވެ.
