ރާއްޖެއަށް ޒިޔާރަތްކޮށް ގެސްޓްހައުސްތަކުގައި ޗުއްޓީ ހޭދަކުރާ ފަތުރުވެރިންނާއި ދިވެހިން އުފާކުރަން ޕިކްނިކް ދާނެ ރަށްތައް ސަރުކާރުން ހަމަޖައްސައިދޭނެ ކަމަށް ފަތުރުވެރިކަމާއިބެހޭ ވަޒީރު ޢަލީ ވަޙީދު ވިދާޅުވެއްޖެއެވެ.
އުކުޅަހުގައި ވާހަކަފުޅު ދައްކަވަމުން ޢަލީ ވަޙީދު މިއަދު ވިދާޅުވީ ގެސްޓް ހައުސްތައް ހިންގާ ފަރާތްތަކުންވެސް އަދި ޢާންމު ރައްޔިތުންވެސް އެންމެ ގިނައިން ކުރާ އެއް ޝަކުވާއަކީ ޕިކްނިކް ދާނެ ރަށެއް ނެތުން ކަމަށެވެ. އެހެންކަމުން އެ މައްސަލައަށް އަވަސް ޙައްލެއް ހޯއްދަވައި ދެއްވާނެ ކަމަށެވެ.
"ރާއްޖޭގެ ރަށްތައް ދެން ބޭނުން ކުރެވޭނީ އެންމެ ފައިދާހުރި ގޮތުގަ. ކަންމަތީ ފިހާރައިން މުދާ ވިއްކައި ހުސްކުރާހެން ރާއްޖޭގެ ރަށްތައް ވިއްކައި ހުސްކުރި ދުވަސް މިވަނީ ނިމިފަ." ޢަލީ ވަޙީދު ވިދާޅުވީ ރައީސް އިބްރާހީމް މުޙައްމަދު ޞާލިޙްގެ ވައުދުތަކުގެ ތެރޭގައި ހިމެނޭ ގެސްޓްހައުސް ޤައުމީ މަހާސިންތާ ފުރަތަމަ 100 ދުވަހުގެ ތެރޭގައި ބާއްވަވައި ހުރި މއްސަލަތައް ދެނެގަނެ ޙައްލު ހޯދުމުގެ މަސައްކަތްތައް ފެށިގެންދާނެ ކަމަށެވެ. މިސަރުކާރަކީ ހުރިހާ ކުލަތަކެއްގެ ސަރުކާރެއް ކަމަށާއި ކޯލިޝަނުގެ ޕާޓީތައް ގުޅިގެން ބަދަހިކަމާއިއެކު މަސައްކަތްކޮށް ރައްޔިތުންގެ އުންމީދުތައް ފުރިހަމަކޮށް ދެއްވާނެ ކަމަށްވެސް ޢަލީ ވަޙީދު ވިދާޅުވިއެވެ.
