އެންމެ މައްސަލައެއްގައި ރައްޔިތުންގެ ފައިސާއިން 80 މިލިއަން ޑޮލަރު ގެއްލުނުކަން ސާބިތުވީމާ އެކަމާއި އަޅާނުލައި ތިބެގެން ނުވާނެ ކަމަށާއި އެކަމުގައި ބައިވެރިވެ އެކަން ކުރި ބައެއްގެ އަތުން އެ ފައިސާ ހޯދަންޖެހޭނެ ކަމަށް މަޖިލީހުގެ މައިނޯރިޓީ ލީޑަރު، ކިނބިދޫ ދާއިރާގެ މެންބަރު ޢަބްދުﷲ ރިޔާޟް ވިދާޅުވެއްޖެއެވެ.
މަޖިލީހުގައި މިއަދު ރިޔާޟް ވިދާޅުވީ އެމްއެމްޕީއާރުސީގެ މައްސަލައިގައި 1.2 ބިލިއަން ރުފިޔާ ގެއްލިފައިވާ ކަމަށް ރައީސް ޢަބްދުﷲ ޔާމީން ވިދާޅުވެފައިވާއިރު އެ މައްސަލަ އާއި ރައީސް ޔާމީނާއި ސީދާ ގުޅުން އެބަހުރިކަން މިހާރުވެސް ވަނީ ސާބިތުކުރެވިފައި ކަމަށެވެ.
ރިޔާޟް ވިދާޅުވީ ދައުލަތުގެ ފައިސާއިން ވައްކަން ކުރުމުގެ ފުރުޞަތު އެއްވެސް މީހަކަށް ދީގެން ނުވާނެ ކަމަށާއި ކޮންމެ މީހަކު ނަމަވެސް ވައްކަން ކޮށްފިނަމަ އެކަމެއް ބަލައި އަޅަންޖެހޭ ފިޔަވަޅުތައް އަޅަން ޖެހޭނެ ކަމަށެވެ.
