ދުނިޔެ މިއޮތީ ބޮޑު ހަނގުރާމައަކަށް ތައްޔާރުވެފައި ކަމަށާއި އެފަދަ ޙާލަތެއްގައި ޤައުމު ދިފާއު ކުރަން ތިބީ ސިފައިންނާއި ފުލުހުންނާއި ކެޑޭޓުން ކަމަށް ވިދާޅުވެ ކެޑޭޓުންނަކީ ކޮންމެ ކަމެއްގައިވެސް އަމިއްލައަށް އިސްނަގައިގެން ހަރަކާތްތެރިވާ ބައަކަށްވުމަށް ތައުލީމީ ވަޒީރު ޑރ. ޢާއިޝަތު ޢަލީ އިލްތިމާސް ކުރައްވައިފިއެވެ.
20 ވަނަ ޤައުމީ ކެޑޭޓް ކޭމްޕްގެ ނިންމުން ފާހަގަކުރަން އިއްޔެ ގިރިފުށީގައި ބޭއްވި ރަސްމިއްޔާތުގައި ޑރ. ޢާއިޝަތު ޢަލީ ވިދާޅުވީ ބާރުގަދަ އެއް ޤައުމު އޮތުމުގެ ބަދަލުގައި 2، 3 ޤައުމަކުން ދަނީ ބާރު ގަދަ ޤައުމުތަކަށް ވުމަށް މަސައްކަތް ކުރަމުން ކަމަށެވެ. ހަމަ އެއާއިއެކު އެންމެ ބާރު ގަދަ ޤައުމުން މަސައްކަތް ކުރަނީ އެހެން ބައަކު ގަދަވިއަ ނުދިނުމަށް ކަމަށެވެ. ޑރ. ޢާއިޝަތު ޢަލީ ވިދާޅުވީ ހަނގުރާމައިގެ ވިލާތައް މިހާރުވެސް ދަނީ އުޑުމަތީގައި އުދުހެމުން ކަމަށެވެ. ޞުލްޙައިގެ މުޢާހަދާތައް ގެންދަނީ އުވާލަމުން ކަމަށެވެ. ހަތިޔާރުތައް ތޫނު ކުރާ އަޑުވެސް ދަނީ އިވެމުން ކަމަށެވެ.
ޑރ. ޢާއިޝަތު ޢަލީ ވިދާޅުވީ ދުނިޔޭގައި ހަނގުރާމައެއް ފެށިއްޖެނަމަ ރާއްޖެއަށް ވަރަށް ބޮޑެތި މައްސަލަތައް ކުރިމަތިވާނެ ކަމަށެވެ. އެގޮތުން ކާބޯތަކެއްޗާއި ތެލާއި ދިރިއުޅެން ކޮންމެހެން ބޭނުންވާ ތަކެތީގެ މައްސަލަތައް ބޮޑުވެގެން ދާނެ ކަމަށެވެ. އަދި ހަނގުރާމައެއް ނުފެށި ޤްދްރަތީ ކާރިސާއެއް ކުރިމަތިވި ނަމަވެސް ކުރިމަތިވާ މައްސަލަތައް މިހާރުވެސް ވަރަށް ގިނަ ކަމަށެވެ.
ޑރ. ޢާއިޝަތު ޢަލީ ވިދާޅުވީ އެންމެ ފުރިހަމަ ކެޑޭޓަކީ ކޮންމެ ކަމެއް ކުރިމަތިވި ނަމަވެސް އަމިއްލައަށް އިސްނަގައިގެން ޤައުމާއި ރައްޔިތުންގެ ހިމާޔަތަށާއި ސަލާމަތަށް މަސައްކަތް ކުރަން ކުރިމަތިލާ މީހާ ކަމަށެވެ. އަދި އަޚްލާޤީ ގޮތުން އެންމެ ފުރިހަމަ ނަމޫނާ ދައްކާ މީހާ ކަމަށެވެ. އަމާނާތްތެރިކަމާއިއެކު ޒިންމާ އުފުލާ މީހާ ކަމަށެވެ. އަދި ޙަޤީޤީ ކެޑޭޓުންނަކީ އެއީ ކަމަށެވެ.
