ރާއްޖޭގެ އުންމީދަކީ ސާކަކީ ޤައުމުތަކުގެ ތަފާތު އެއްކައިރިކޮށް މި ޞަރަޙައްދުގައި ދިރިއުޅޭ މީހުންގެ ލާބައާއި މަންފާއަށް އެންމެން އެކުގައި މަސައްކަތްކުރާނެ ޖަމިއްޔާޢަކަށް ވުމަށް އުއްމީދުކުރައްވާކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ރައީސް އިބްރާހީމް މުޙައްމަދު ޞާލިޙް މިމޭރުމުން ވިދާޅުވެފައިވަނީ "ސާކް ޗާޓަރ ޑޭ"ގެ މުނާސަބަތުގައި ސާކްގެ ސެކްރެޓަރީ ޖެނެރަލް އަމްޖަދް ބީ. ސިއާލްއަށް މިއަދު ފޮނުއްވި ސިޓީފުޅެއްގައެވެ.
ރައީސުލްޖުމްހޫރިއްޔާގެ ސިޓީފުޅުގައި ވިދާޅުވެފައިވަނީ ސާކު ހިމެނޭ ޞަރަޙައްދުގައި ޞުލްޙަ ޤާއިމުކޮށް، އިޖްތިމާޢީ އަދި އިޤްތިޞާދީ ހަމަޖެހުން ޤާއިމްކުރުމަށް ދިވެހިރާއްޖެ އަބަދުވެސް އެއްބާރުލުން ދެއްވާނެކަމަށެވެ.
ރައީސުލްޖުމްހޫރިއްޔާގެ ސިޓީފުޅުގައި، ސާކް އުފެދުނުތާ 34 ވަނަ އަހަރު މިއަދު ފާހަގަކުރަމުންދާއިރު، ދިވެހި ސަރުކާރާއި ރައްޔިތުންގެ ނަމުގައި ސާކް ސެކްރެޓަރީ ޖެނެރަލަށާއި، ސާކް ގެ މެންބަރު ޤައުމުތަކާއި، ސާކްގެ މުވައްޒަފުންނަށް ދުވަހުގެ ހެޔޮއެދުމާއި ތަހުނިޔާ އަރިސްކުރައްވާފައިވެއެވެ.
ރައީސުލްޖުމްހޫރިއްޔާގެ ސިޓީފުޅުގައި، 1985 ވަނަ އަހަރުގައި ސާކް އުފެދި ހަރަކާތްތެރިވާން ފެށިފަހުން، މި ޞަރަޙައްދުގެ ޤައުމުތަކުގައި ތަފާތު އެކި ދާއިރާތަކުން، ޚާއްޞަކޮށް އިޖްތިމާޢީ އަދި އިޤްތިޞާދީ ރޮނގުން ޤައުމުތަކަށް ކުރިއެރުން ހޯދައިދިނުމުގައި އެޖަމްޢިއްޔާއިން ވަރަށް މުހިންމު ރޯލެއް އަދާކުރަމުން އަންނަކަން ފާހަގަކުރައްވައި، އެއްޤައުމު އަނެއް ޤައުމާ ގުޅުން ބަދަހިކުރުމުގައިވެސް ސާކުން މިހާރުވެސް އިސް ރޯލެއް އަދާކުރަމުން އަންނަކަން ފާހަގަކުރައްވާފައިވެއެވެ.
ދެކުނު އޭޝިޔާއަކީ މުއްސަނދި ސަޤާފަތެއް ހިމެނޭ ޞަރަޙައްދެއްކަން ފާހަގަކުރައްވަމުން ރައީސުލްޖުމްހޫރިއްޔާގެ ސިޓީފުޅުގައި، އެކި ޤައުމުތައް ތަފާތުވީ ނަމަވެސް ހުރިހާ ޤައުމެއްވެސް އެއްގަލަކަށް އަރައިގެން މަސައްކަތް ފެށީ އޭޝިޔާ ބައްރަކީ ޞުލްޙަވެރި ތަނަވަސް ސަރަހައްދަކަށް ހެދުމަށް ކުރާ އުއްމީދުގެ ސަބަބުންކަން ފާހަގަކުރައްވާފައިވެއެވެ. މިގޮތުން، ސާކުގެ މެންބަރު ޤައުމުތަކަށް ދިމާވާ ގޮންޖެހުންތަކުން އަރައިގަތުމަށް ދިވެހިރާއްޖެއިން އަބަދުވެސް ފުރިހަމަ އެއްބާރުލުމާ އެހީތެރިކަން ދެއްވާނެކަން ރައީސުލްޖުމްހޫރިއްޔާ ވަނީ ކަށަވަރުކޮށްދެއްވާފައެވެ.
