މާލޭގައި ހުރި އެންމެ ނުރައްކާތެރި އަދި އެންމެ ނަޖިސް ތަންތަނަކީ މަސާޖްޕާލާ އާއި އެނޫންވެސް ތަފާތު ނަންނަމުގައި ހިންގާ "ނާސިގެ"ތައް ކަމަށްބުނެ މާލެއިން އެތަންތަން ނައްތާލައި މާލެ ސާފުކޮށްލައި ދެއްވުމަށް ގިނަ ބައަކު އެދެމުން އެބަ ގެންދެއެވެ.
ރައީސް އިބްރާހީމް މުޙައްމަދު ޞާލިޙް، މާލެ ސާފުކުރުމަށް މިއަދު ފެށްޓެވި ކެންޕޭނާއި ގުޅިގެން ގިނަ ބައަކު ބުނަމުން ގެންދަނީ އެއީ ވަރަށް މުހިންމު ކެންޕޭނެއް ކަމަށެވެ. އަދި އެ ކެންޕޭނުގެ ސަބަބުން މާލޭގެ ސާފުތާހިރުކަން ވަރަށް ބޮޑުތަނުން އިތުރުވެގެންދާނެ ކަމަށާއި އެއީ ލިބޭނެ ވަރަށް ބޮޑު ކުރިއެރުމެއް ކަމަށެވެ.
"ހަމަ އެއާއެކު އަޅުގަނޑުމެން އެދެނީ ތަފާތު ނަންނަމުގައި މިހިންގާ "ނާސިގެ"ތައް ނަތާލަ ދެއްވައި އެ މުޞީބާތުންވެސް މާލެ ސާފުކޮށްލަ ދެއްވުން. އަޅުގަނޑުމެންނަށް ފެންނަ އެންމެ ބޮޑު ގޮނޑަކީ ވެސް އަދި ނަޖިހަކީވެސް ހަމަ އެއީ. މާލެވެސް އެހެން ރަށްތައްވެސް ތާހިރު ކުރެވޭނީ އެތަންތަނުން ރަށްތަށް ސާފުކުރެވިގެން." ކަމަށް ބައެއް މީހުން ބުނެފައިވެއެވެ.
ބައެއް މީހުން ބުނެފައިވަނީ އެހެން މުއައްސަސާތަކަށް އަދި ޢާންމުންނަށް ނުކުރެވޭ ހުރިހާ ކަމެއްވެސް ކުރަނީ ސިފައިން ކަމަށާއި މިތަންތަން ސާފުކުރުމުގައި ސިފައިންގެ އެހީތެރިކަން ހޯދަން މިހާރު ޖެހިފައިވާ ކަމަށެވެ.
