ދިވެހިންނަކީ އަބަދުވެސް ވަރަށް ސާފު ތާހިރު، އަދި އެކަމުގައި ދުނިޔެއަށް ނަމޫނާ ދައްކަމުން އައި ބައެއް ކަމަށާއި ދިވެހިންގެ ކިބައިގައި ކުރީންސުރެ ހުރި ސާފުތާހިރުކަމުގެ ސިފަ އަލުން އަށަގަނުވައި، މި ރާއްޖެއަކީ ސާފުތާހިރު ހިތްގައިމު ތަނެއްގެ ގޮތުގައި ދެމެހެއްޓުމުގެ މަސައްކަތް އެންމެން އެކުގައި ފެށުމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ރައްޔިތުންގެ އަރިހުން އެދިވަޑައިގެންފިއެވެ.
އެމަނިކުފާނު މިކަމަށް އެދިވަޑައިގަތީ ރާއްޖެ ސާފުކުރުމުގެ ޤައުމީ ޕްރޮގްރާމް އިފްތިތާޙުކޮށްދެއްވުމުގެ ގޮތުން މިއަދު ހެނދުނު ހެނދުނު ޓަރފް ދަނޑުގައި ބޭއްވި ސާފުކުރުމުގެ ޙަރަކާތުގެ ފެށުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ. މި ރަސްމިއްޔާތުގައި ވާހަކަފުޅުދައްކަވަމުން ރައީސުލްޖުމްހޫރިއްޔާ ވިދާޅުވީ ރާއްޖެ މަޝްހޫރުވެފައިވަނީ ސާފުތާހިރުކަމަށް ލޯބިކުރާ، ގޮތްހުރި ބަޔަކު ދިރިއުޅޭ ޖަޒީރާރަށްތަކެއްގެ ގޮތުގައިކަމަށާއި، ތަރައްޤީގައި ކިތަންމެ ކުރިއަށްދިއަ ނަމަވެސް ޖަޒީރާވަންތަ ސިފަ ދެމެހެއްޓޭނީ، ދިވެހިންގެ މި ޗާލު ވެށި ސާފުތާހިރުކޮށް ބަލަހައްޓައިގެންކަމަށެވެ.
ރައީޞާލިޙް ވިދާޅުވީ މި ސަރުކާރުގެ ފުރަތަމަ ސަތޭކަ ދުވަހުގެ ތެރޭގައި، މުޅި ރާއްޖެ ސާފުކުރުމުގެ ޕްރޮގްރާމެއް ފަށަން ނިންމާފައިވަނީވެސް މި ރާއްޖޭގެ ހިތްގައިމުކަމާއި ނަލަކަން، އެގޮތުގައި ދަމަހައްޓައިގެން މެނުވީ، ރާއްޖޭގެ ޤުދްރަތީ މުއްސަނދި ކަމުގެ ނަފާ، ހެޔޮގޮތުގައި ނުލިބޭނެކަމަށް ގަބޫލުކުރެވޭތީ ކަމަށެވެ. ރައީސް އިބްރާހީމް މުޙައްމަދު ޞާލިޙް ވިދާޅުވީ ކުނި ނައްތާލުމަކީ، މި ރާއްޖޭގެ ކޮންމެ ރަށަކަށްމެ ދިމާވެފައިވާ ވަރަށް ބޮޑު އިޖުތިމާޢީ މައްސަލައެއްކަމަށާއި، މިފަދަ ކޮންމެ މައްސަލައެއްގެ ޙައްލު ފެށެނީ، ފަރުދުންގެ ކިބައިން ކަމުގައިވާތީ، މިކަމުގައިވެސް ފަރުދީ ޒިންމާގެ ދައުރު ވަރަށްބޮޑުކަމަށެވެ.
ކޮންމެ ރަށަކަށް ކުނި މެނޭޖްކުރެވޭނެ ނިޒާމަކަށް ބޭނުންވާކަން އެމަނިކުފާނު ގަބޫލުފުޅުކުރައްވާކަމަށާއި، ކުނި މެނޭޖް ކުރުމުގެ އެންމެކުރު މަގަކީ، ކުނި އުފެދޭ މިންވަރު މަދުކުރުން ކަމުގައި އެމަނިކުފާނު ވިދާޅުވިއެވެ. އަދި، ސަރުކާރުގެ އަމާޒަކީ ތިމާވެށްޓާ ރަޙްމަތްތެރި ގޮތެއްގައި ކުނި ނައްތައިލެވޭނެ އިންތިޒާމުތައް ހަމަޖެއްސުންކަމުގައި ރައީސް އިބްރާހީމް މުޙައްމަދު ޞާލިޙް ވިދާޅުވިއެވެ.
މިއަދު މި ފެށިގެންދާ ސާފުކުރުމުގެ ހަރަކާތަކީ އަންނަން އޮތް ޖީލުތަކަށް މިމުއްސަނދި ވެށި ފުރިހަމަކަމާއެކު ފޯރުކޮށްދިނުމުގެ މުހިއްމު މަސައްކަތެއްކަމަށާއި، ތިމާވެށީގެ ނުރައްކާތަކުން މި ދުނިޔެ ސަލާމަތްކުރުމަށް ކުރާ މަސައްކަތުގައި، ޖަޒީރާ ޤައުމެއްގެ ލީޑަރެއްގެ ގޮތުގައި، މި ރާއްޖެއަށް ދެމިއޮވެވޭނީވެސް ސާފުތާހިރުކަންމަތީ މި ރާއްޖެ ބާއްވައިގެންކަމުގައި ރައީސް އިބްރާހީމް މުޙައްމަދު ޞާލިޙް ވިދާޅުވިއެވެ. ރާއްޖެ ސާފުކުރުމުގެ ޤައުމީ ޕްރޮގްރާމް އިފުތިތާޙުކޮށްދެއްވުމުގެ ގޮތުން މިރަސްމިއްޔާތުގައި ރައީސުލްޖުމްހޫރިއްޔާއަށް ވަނީ ފިހިގަނޑަކާއި އަންގިއެއް ހަދިޔާކުރައްވާފައެވެ.
އަދި، އެމަނިކުފާނު ވަނީ ރައީސުލްޖުމްހޫރިއްޔާގެ ނައިބު ފައިޞަލް ނަސީމާއި، ރައީސް މައުމޫން ޢަބްދުލްޤައްޔޫމާއި، ދައުލަތުގެ ވަޒީރުންނާއި، މާލޭ ސިޓީގެ މޭޔަރާއި، ޑަބްލިޔޫ.އެޗް.އޯ. ރެޕްރެޒެންޓެޓިވް ޑޮކްޓަރ އަރްވިންދް މާތުރްގެ އަރިހުގައި ސާފުކުރުމުގެ މި ހަރަކާތުގައި އަމަލީގޮތުން ބައިވެރިވެވަޑައިގެންފައެވެ.
