"ޝަރީޢާ ކިޔަވާފައިވާ މީހުންނަށް ލަނޑުދީ، ވަކާލާތުކުރުމުން މަޙްރޫމް ކުރުވަން އުޅުމަކީ ލާދީނީ ކަމެއް! އެބިލް މަޖިލީހަށް ހުށަހެޅުއްވި މެންބަރު އަޅުގަނޑު ގޮވާލަން ވަގުތުން ވަގުތަށް ތިއަ ބިލް އަނބުރާ ނެންގެވުމަށް! ޝަރީޢާ އަކީ ޤާނޫނު! އިސްލާމީ ޤާނޫނު! ރާއްޖޭގެ ޤާނޫނު އަސާސީއަކީ އިސްލާމީ ޝަރީއަށް ބޭސްކޮށްގެން ހަދާފައިވާ އެއްޗެއް!"
މިއީ ޝައިޚް ޢަލީ ޒައިދު ކުރައްވާފައިވާ ޓްވީޓެކެވެ.
މަޖިލީހަށް މިހާރު ހުށަހަޅާފައިވާ ބިލާއި ބެހޭގޮތުން އިސްލާމީ ޝަރީޢާ އިން މަތީ ތައުލީމް ޙާޞިލުކުރައްވައިގެން ތިއްބެވި ރާއްޖޭގެ އެންމެ ފުންނާބު އުސް ދީނީ ޢިލްމުވެރިންގެ ތެރޭގައި ހިމެނިވަޑައިގަންނަވާ ބައެއް ޤާނޫނީ ވަކީލުންވެސް ގެންދަވަނީ ކަންބޮޑުވުން ފައުޅުކުރައްވަމުންނެވެ.
އެފަދަ ބައެއް ބޭފުޅުން ވިދާޅުވަނީ ރާއްޖޭގެ ކޯޓުތަކުގައި ޙުކުމް ކުރަނީ އިސްލާމީ ޝަރީޢާގެ މައްޗަށް ކަމަށާއި އިސްލާމީ ޝަރީޢާ އިން ކިޔަވާފައި ނެތްނަމަ ކުރިމަތިވާނެ މައްސަލަތައް ހުންނާނެ ކަމަށެވެ. އަދި އިސްލާމީ ޝަރީޢާ ކިޔަވައިގެން ތިބި ނަމަ އެފަދަ އެއްވެސް މައްސަލައެއް ކުރިމަތި ނުވާނެ ކަމަށެވެ.
"ޤާނޫނުގައި ވަކި ގޮތަކަށް ކަނޑައަޅާފަ ނެތް ކަންކަމުގައިވެސް ރިޢާޔަތް ކުރަން ޖެހޭނީ އިސްލާމީ ޝަރީޢާއަށް ކަމަށް ޤާނޫނުގަ އެބައޮތް. މިހެން ޤާނޫނުގައި އޮތް ނަމަވެސް ބޭރުގެ ކޮންމެވެސް ޤައުމަކުން ޤާނޫނު ކިޔަވައިގެން އައުމުން ވެސް އެބަ ވަކީލުކަން ކުރެވޭ. އިސްލާމީ ޝަރީޢާ އަކީ އިސްލާމީ ޤާނޫނު. ދެން ކީއްވެގެންތޯ އިސްލާމީ ޝަރީޢާ ކިޔެވީމަ ވަކީލުކަން ނުކުރެވެންވީ؟"
"ހުށަހަޅައިގެން އުޅޭ ޤާނޫނުގަ އެބަ ބުނޭ. އެ ޤާނޫނުގަ ބަޔާންކުރާ މޮޑިޔުލްސްތައް 3 އަހަރު ތެރޭ ފުރިހަމަ ކުރަންވެސް. ނަމަވެސް ރާއްޖޭގައި ކިޔަވައިދެމުން އަންނަ ސިލަބަހުގައި އެ މޮޑިޔުލްސްތައް ކަވަރުކުރެވޭނީ 4 އަހަރުން. ދެން ކިހިނެއްތޯ 3 އަހަރުން އެކަން ކުރާނީ. މިއީ ވެސް ކުރިމަތިވާނެ ވަރަށް ބޮޑު ގޮންޖެހުމެއް."
އިސްލާމީ ޝަރީޢާ ކިޔަވައި ވިދާޅުވެގެން ތިއްބެވި ބައެއް ޤާނޫނީ ވަކީލުން ވިދާޅުވަނީ މިބިލް މިހާރު ފަރުމާ ކޮށްފައި އޮތް ގޮތުން މިއީ އިސްލާމީ ޝަރީޢާ ކިޔަވައި ވިދާޅުވެގެން ތިއްބެވި ބޭފުޅުންނަށް "ލޮޓިއެއް" ދޭން ކޮށްފައިވާ ކަމެއް ކަމަށް ޤަބޫލުފުޅު ކުރެއްވޭ ކަމަށެވެ.
Sharia kiyavaafaivaa meehunnah landu dhee, vakaalaath kurumun mahroom kuruvan ulhumee laadheenee kameh! e bill hushaelhuhvi MP ah alhugandu govaalan vaguthun vaguthah thiya bill nengevumah! Shari akee Law. Islamic Law! Raajjeyge Qaanoon akee Islamic sharia based ehcheh!
— Ali Zaid (@alizaid1000) December 4, 2018
