އިސްލާމް ދީން ފެތުރުމުގެ މަސައްކަތް ދައުލަތްތަކުންނާއި ދީނީ ޢިލްމުވެރިންވެސް ގެންދަނީ ކުރައްވަމުންނެވެ. ނަމަވެސް އެ މަސައްކަތަކީ ހަމަ ކޮންމެ މުސްލިމަކުވެސް ކުރަނެޖެހޭ މަސައްކަތެކެވެ. ވީމާ ބައަކު ކުރާނެ ކަމަށް ބަލައި ހުރިހާ ކަމެއް ދޫކޮށްލައިގެން ތިބުމެއް ނެތެވެ.
މުސްލިމް ދައުލަތްތަކަށް ނިކަން ބަލައިބަލާށެވެ! ދައުލަތުގެ ސިޔާސަތުތައް ހާމަކުރާއިރު އިސްލާމް ދީން މަތިވެރިކުރާނެ ކަމުގެ ވާހަކަތައް ދައްކާނެއެވެ. ނަމަވެސް ކުރާނީ ކޮން ކަމެއްކަން ބުނާނީ ވަރަށް މަދުފަހަރަކުއެވެ. މުންކަރާތްތައް މުޖުތަމައުތަކުގައި ޢާންމުވަމުން އަންނައިރު އެކަންކަން ހުއްޓުވަން އަޅާނެ ފިޔަވަޅުތަކުގެ ވާހަކަތައް ދައްކަނީވެސް މަދު ފަހަރަކުއެވެ. އަދި އެކަންކަމަށް ހަދާފައި ހުންނަ ޤާނޫނުތައްވެސް މިދަނީ ތަންފީޒު ނުކުރެވިއެވެ.
މިކަންކަމުގެ ނަތީޖާއަކަށް ވެގެން މިދަނީ މުޖުތަމައުތައް އިސްލާމް ދީނާއި ދުރުވަމުން ދިއުމެވެ. މުސްލިމުންގެ ނަމުގައި ތިބި ނަމަވެސް ޢަމަލުކުރާނެ މީހުން މަދުވަމުން ދިއުމެވެ. ކޮންމެ ޤައުމެއްގެ މިސްކިތްތަކުންވެސް މިފެންނަނީ ހަމަ އެ މަންޒަރުތަކެވެ.
މިހެންވަމުން މިދަނީ އިސްލާމް ދީނުގެ ޢަދާވާތްތެރިން އިސްލާމް ދީނާއި ކެނޑިނޭޅި ކުރަމުން ގެންދާ މަސައްކަތްތަކުގެ ސަބަބުންނެވެ. އެމީހުން ފަތުރާ ދައުތަކުގައި ޒުވާން ޖީލު ޖެހެމުންދާ މިންވަރު އިތުރުވަމުންދާތީއެވެ. އެކަން އެމީހުންނަށް ކާމިޔާބު އެކުރެވެނީ އެކަންކަމުން ސަލާމަތްވުމަށް ކުރަންޖެހޭ މަސައްކަތްތައް ކުރުމުގައި މުސްލިމުން ފޭލްވެފައިވާތީއެވެ.
މުސްލިމް ބޮޑެތި ޤައުމުތަކަށް ނިކަން ބަލައިބަލާށެވެ! ކުޅިވަރަށް ދޭ ސަމާލުކަމާއި ކުރާ ޚަރަދުވެސް އިސްލާމް ދީން މަތިވެރިކުރާކަށް ނުކުރެއެވެ. ދެން ނުވެނުދާނެ ގޮތްތައް މިދަނީ ވަމުންނެވެ.
ލޮބުވެތި އަޚުންނާއި އުޚުތުންނޭވެ! އިސްލާމް ދީން މަތިވެރިކުރުމަށް އެމީހަކަށް ކުރެވެން ހުރި ހުރިހާ މަސައްކަތްތަކެއް ގަދައަޅައި ކުރާށެވެ! ކޮންމެ މީހަކީ އެހެން ބައަކު އިސްލާމް ދީނަށް ވެއްދުވުމުގެ ކުޅަދާނަކަން ނެތް މީހަކަށްވެދާނެއެވެ. އެއީ އެއްވެސް މައްސަލައެއް ނޫނެވެ. ކޮންމެ މީހަކީވެސް އެމީހެއްގެ ޢާއިލާގެ މީހުން ލައްވައި ދީނަށް އަމަލުކުރުވަން މަސައްކަތް ކުރާ މީހަކަށް ވެވިދާނެއެވެ.
ކޮންމެ ބައްޕައަކީ ވެސް ދަރިން ގޮވައިގެން މިސްކިތަށް ގޮސް އެކުދިން ލައްވައި ނަމާދުކުރުވާ މީހަކަށް ވެވިދާނެއެވެ. ކާފައިންނަށްވެސް މި ދައުރު އަދާކުރެވިދާނެއެވެ. އަޅުކަމަކަށްވާނީ ދުރު މީހަކަށް މަގު ދެއްކުމަކުން އެކަންޏެއް ނޫނެވެ. ދުރު މީހަކަށް މަގުދެއްކުމަށްވުރެ ޢާއިލާއަށް މަގުދެއްކުމުގެ މުހިންމުކަން އަހަރެންގެ ކުރިމަތީގައި މާބޮޑެވެ. އެހެނީ ކޮންމެ މީހަކީ ވެސް އެމީހެއްގެ ބެލެނިވެރިކަމުގެދަށުގައި ތިބި ބައެއްގެ ޒިންމާ އުފުލަން ޖެހޭނެ މީހަކަށް ޤިޔާމަތް ދުވަހުގައި ވާނެތީއެވެ!
އަނބިން ލައްވައި ނަމާދު ކުރުވުމަކީ ފިރިމީހާއަށް މަޖުބޫރު ކަމެކެވެ. ހަމަ އެފަދައިން ފިރިން ލައްވައި ނަމާދުކުރުވުމަކީ އަނބިން ވެސް ކުރަންޖެހޭ ކަމެކެވެ. ކިޔަމަންނުވާ ފިރިންނާއިއެކު ދިރިއުޅުމެއް ނެތެވެ. އަދި ކިޔަމްން ނުވާ އަނބިން ގެންގުޅުމެއްވެސް ނެތެވެ. ނަމާދު ނުކުރާ އަންބަކު ދަރިން ލައްވައި ނަމާދެއް ނުކުރުވާނެއެވެ! އިސްލާމީ ތަރުބިއްޔަތެއްވެސް ނުދޭނެއެވެ! ވީމާ މިކަންކަމަށް ރަނގަޅަށް ވިސްނައިގެން ކޮންމެ މީހަކުވެސް އެމީހަކަށް ވެވުނު ވަރަކުން އިސްލާމް ދީން މަތިވެރިކުރަން މަސައްކަތް ކުރާށެވެ! ޢާޚިރަތް ދުވަހުގެ ސަލާމަތްކަން އެހެން ހުރިހާ ކަމަކަށްވުރެ މުހިންމުކަން ޔަޤީންކޮށްގެން ދިރިއުޅޭށެވެ!
- އިސްލާމީ ތިލަފަތުގެ ދަރުސަކުން
