އެސިސްޓެންޓް ކޮމިޝަނާ އޮފް ޕޮލިސްގެ މަގާމާއި އިންޓެލިޖެންސް ޑިޕާޓްމަންޓްގެ ވެރިޔާގެ މަގާމު މުހައްމަދު ހަމީދު (އެމްސީ ހަމީދު) އަށް ހަވާލު ކުރައްވައިފިއެވެ.
ޗީފް ސްޕްރިޑެންޓެއްގެ މަގާމުގައި ކުރިން ހުންނަވަނިކޮށް 2012 ވަނަ އަހަރު ވަޒީފާއިން ވަކިކޮށްފައިވަނީ ފުލުހުންގެ ސިއްރު މައުލޫމާތު ތަކެއް ލީކްކޮށްލިކަމުގެ ތުހުމަތުގައެވެ.
އެހެހްނަމަވެސް ފުލުހުންގެ ވަޒީފާއިން އޭނާ ވަކިކުރީ ރަނގަޅަށް ނޫން ކަމަށް ސްޕްރީމް ކޯޓުން މިމަހުގެ ދެވަނަ ދުވަހު ވަނީ ހުކުމް ކޮށްފައެވެ. ސްޕްރީމް ކޯޓުން ކުރި ހުކުމުގައި ބުނެފައި ވަނީ ހަމީދު ވަޒީފާއިން ވަކިކުރި ދުވަހުން ފެށިގެން، ވަޒީފާ އަނބުރާ ދިނުމާއި ހަމައަށް އޭނާ ހުރި މަގާމުގެ މުސާރައާއި އިނާޔަތްތައްވެސް ދިނުމަށެވެ.
ފުލުހުންގެ ވަޒީފާ އަލުން ދޭން ސުޕްރީމް ކޯޓުން އަމުރު ކުރުމާއި ގުޅިގެން ހަމީދު ވަނީ ޝުކުރު އަދާކުރައްވާފައެވެ.
ޙަމީދު ވިދާޅުވެފައިވަނީ އޭނާ އަދާކުރެއްވި މަޤާމަށް ބެއްލެވުމެއް ނެތި ކޮންމެ މަޤާމެއްގައި ނަމަވެސް ފުލުހެއްގެ ގޮތުގައި ޚިދުމަތް ކުރައްވަން ތައްޔާރަށް ހުންނެވި ކަމަށެވެ. އަދި ގެއްލިފައިވާ އިތުބާރު ފުލުހުންނަށް ހޯއްދަވައި ދެއްވުމަށާއި ފުލުހުންގެ މަސައްކަތްތައް ރަނގަޅު ކުރެއްވުމަށް މަސައްކަތް ކުރައްވާނެ ކަމަށެވެ.
