ރަށްރަށަށް ސަރުކާރުގެ އިސްވެރިން ވަޑައިގަންނަވާއިރު މަރުހަބާ ކިޔަން ސްކޫލްތަކުގެ ދަރިވަރުން ނުނެރުމަށް އެޑިއުކޭޝަން މިނިސްޓްރީން މިއަދު އަންގައިފިއެވެ.
އެޑިއުކޭޝަން މިނިސްޓަރ ޑރ.އައިޝަތު އަލީ ސޮއި ކުރައްވާ މިއަދު ނެރުއްވި ސާކިއުލާ އެއްގައި ވިދާޅުވެފައިވަނީ ރަށްރަށަށް އިސްވެރިން ކުރައްވާ ދަތުރު ތަކުގައި މަރުހަބާ ކިޔަން ދަރިވަރުން ނެރެ ކޮޅަށް އަދި އަވީގައި ބޭތިއްބުމަކީ ދަރިވަރުންގެ ސިއްހަތަށް ނޭދެވޭ އަސަރު ކުރާ ކަމެއް ކަމަށާއި އެކަމުގެ ސަބަބުން ދަރިވަރުންނާއި ބެލެނިވެރިންގެ ވެސް ގިނަ ވަގުތުތަކެއް ގެއްލިގެންދާ ކަމަށެވެ.
ދަރިވަރުން އެގޮތަށް ނެރުމަކީ ކޮންމެހެން ބޭނުންތެރި ކަމަކަށް ނުވާތީ އެގޮތަށް އެކަން ނުކުރުމަށް ސްކޫލްތަކަށް މިނިސްޓަރު އަންގަވާފައިވެއެވެ.
ސަރުކާރުގެ އިސްވެރިންނާއި ރާއްޖެއިން ބޭރުގެ ބައެއް އިސް ފަރާތްތައް ޒިޔާރަތް ކުރާއިރު ވެސް، މަރުހަބާ ކިޔަން ދަރިވަރުން ނެރުމަކީ ރާއްޖޭގައި މީގެ ކުރިންވެސް ކުރަމުން އަންނަ ކަމެކެވެ. އަދި މިކަމަކީ ގިނަ ބެލެނިވެރިންގެ ފަރާތުން އެތަކެއް ޝަކުވާތަކެއް ވެސް ލިބިފައިވާ ކެމެކެވެ.
