މަރުވާމީހުންގެ ސަންދޯއް މާލެއިން ހުޅުމާލެއަށް އުފުލަން 2 ދޯނި ގަތުމުގައިވެސް މައްސަލަތަކެއް އެބަހުރިކަން ހާމަވެއްޖެއެވެ.
2 ދޯނި ގަތުމަށް އިސްލާމިކް މިނިސްޓްރީން އެޗްޑީސީ އާއި ވަނީ 4 މިލިއަން ރުފިޔާ ހަވާލުކޮށްފައެވެ. ނަމަވެސް 2 ދޯނި ގަންނަން ޚަރަދުކޮށްފައިވީ 3.2 މިލިއަން ރުފިޔާއެވެ.
ދޯނި ގަތުމަށްފަހު އެއް ދޯނީގެ މަރާމާތަށް 230072 ރުފިޔާ ވަނީ ޚަރަދުކޮށްފައެވެ. ދެވަނަ ދޯނި މަރާމާތުކުރުމަށް 253600 ރުފިޔާ ވަނީ ޚަރަދުކޮށްފައެވެ. ކުޑަ ދުވަސްކޮޅެއްގެ ތެރޭގައި އެއް ދޯނީގެ އިންޖީނު ހަލާކުވެގެން ހަދަން އެމްޓީސީސީ ތިލަފުށި ޑޮކްޔާޑުގައި ބޭއްވުމުން މިއަހަރުގެ އެޕްރިލް މަހާއި ހަމައަށް ޖުރުމަނާގެ ގޮތުގައި ހަތް ލައްކައަށްވުރެ ގިނަ ރުފިޔާ ވަނީ ދައްކަން ޖެހިފައެވެ.
އެ ދޯނީގެ އަޅާފައިވާ އިންޖީނުގެ ސްޕެއާ އަކީ ރާއްޖެއިން ލިބޭ ބާވަތަކަށް ނުވާތީ ރާއްޖެއިން ސްޕެއާ ލިބޭ އިންޖީނަކަށް ބަދަލުކުރަން ވަނީ ލަފާދީފައެވެ. މީގެ މާނައަކީ އެ ދޯނި ގަނެފައި އެވަނީ މިފަދަ އެއްވެސް ކަމަކަށް ނުބަލައި ކަމެވެ. މީހަކަށް ބޮލުން ނައްޓާ ނުލެވިފައި އޮތް ދޯންޏެއް ގަތީ ކަމެވެ.
އޮޑިޓަރ ޖެނެރަލް ވިދާޅުވެފައިވަނީ މި ދެ ދޯނި ގަނެފައިވަނީ 2015 އަހަރު ނަމަވެސް މިއަހަރުގެ މެއި މަހުގެ 31 ވަނަ ދުވަހު އޮޑިޓުގެ މަސައްކަތް ނިންމި އިރުވެސް ދޯނީގެ ރަޖިސްޓަރީވެސް އޮތީ ވިއްކި މީހާގެ ނަމުގައި ކަމަށެވެ. މާނައަކީ 3 އަހަރު ފާއިތުވި އިރުވެސް އޮތީ ރަޖިސްޓްރީ ބަދަލު ނުކުރެވިކަމެވެ.
އޮޑިޓަރ ޖެނެރަލް ވަނީ މިކަމުގައި އިސްލާމިކް މިނިސްޓްރީން އިހުމާލުވުމުން ދައުލަތަށް ލިބިފައިވާ ގެއްލުންތައް ފާހަގަކުރައްވައިފައެވެ.
