މިއަހަރުގެ މިނިވަން ދުވަހުގެ މުނާސަބަތުގައި ބޭއްވުމަށް ހަމަޖެއްސި އެމްއެންޑީއެފްގެ ޝަރަފުގެ ހިނގާލުމާއި ޕެރޭޑް، މި މަހުގެ 29 ވާ ބުރާސްފަތި ދުވަހު ބޭއްވުމަށް ނިންމައިފިއެވެ. މި ޕެރޭޑަކީ މީގެ ކުރިން ބޭއްވުމަށް ތާވަލުކުރި ނަމަވެސް، މޫސުން ގޯސްވުމުގެ ސަބަބުން ފަސްކުރަން ޖެހުނު ހަރަކާތެކެވެ.
އެމްއެންޑީއެފުން މައުލޫމާތު ދޭ ގޮތުގައި، މި ޕެރޭޑް ކުރިއަށް ގެންދިއުމަށް މިހާރު ހަމަޖެހިފައިވަނީ އޯގަސްޓް 29 ވާ ބުރާސްފަތި ދުވަހުގެ ހަވީރު 4:30 ގައެވެ. މި ހަރަކާތް ކުރިއަށްދާނީ ހުޅުމާލޭގެ އެކި ސަރަހައްދުތަކުގައެވެ.
މި ޕެރޭޑް ކުރިއަށްދާ ވަގުތު ހުޅުމާލޭގެ އެކި ސަރަހައްދުތަކަށް މަޑުކޮށް، ސިފައިންގެ ބޭންޑުގެ ހަރަކާތްތައް ދައްކާލުމަށް ވަނީ ހަމަޖެހިފައެވެ. މިއީ އާންމުންނަށް މި ހަރަކާތްތައް ކައިރިން ބަލާލުމަށް ލިބޭނެ ރަނގަޅު ފުރުސަތެކެވެ.
މިއަހަރުގެ މިނިވަން ދުވަހުގެ ޕެރޭޑަކީ ވަރަށް ފުޅާކޮށް ބޭއްވުމަށް ތައްޔާރުވެފައިވާ ހަރަކާތެކެވެ. އެގޮތުން ގައުމީ ދިފާއީ ބާރުގެ އިތުރުން، 15 ސްކޫލަކުން މި ޕެރޭޑުގައި ބައިވެރިވާނެކަން ފާހަގަކޮށްލެވެއެވެ.
ކުރިން ބޭއްވުމަށް ހަމަޖެހިފައި އޮތް ޕެރޭޑް ވިއްސާރަވުމުގެ ސަބަބުން ކެންސަލްކުރަން ޖެހުނު ނަމަވެސް، އަންނަ ބުރާސްފަތި ދުވަހު މި ހަރަކާތް ކުލަގަދަކޮށް ބޭއްވުމަށް މިހާރު ދަނީ ތައްޔާރުވަމުންނެވެ.
