މާލީ ކަންކަމާއި ސަރުކާރުގެ ކުންފުނިތަކާ ބެހޭ ވަޒީރު، މޫސާ ޒަމީރު މަގާމުން އިސްތިއުފާދެއްވައިފިއެވެ. މިނިސްޓަރ އޮފް ފިނޭންސް އެންޑް ޕަބްލިކް އެންޓަރޕްރައިޒަސްގެ މަގާމުގައި ހުންނެވި ޒަމީރު އިސްތިއުފާ ދެއްވިކަން ސަރުކާރުގެ އިސް ތަރުޖަމާނު މުޙައްމަދު ޙުސެއިން ޝަރީފް ވަނީ މީޑިއާތަކަށް ކަށަވަރުކޮށްދެއްވާފައެވެ.
މޫސާ ޒަމީރު ކުއްލި ގޮތަކަށް މަގާމުން އިސްތިއުފާ ދެއްވި ނަމަވެސް، އެމަނިކުފާނު އިސްތިއުފާ ދެއްވި ސީދާ ސަބަބެއް ސަރުކާރުގެ ފަރާތުން މިހާތަނަށް ހާމަކޮށްފައެއް ނުވެއެވެ. މިއީ މި ސަރުކާރުގެ ކެބިނެޓުން މިފަދަ މުހިންމު ވަޒީރަކު އިސްތިއުފާ ދެއްވި ފުރަތަމަ ފަހަރެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ ވަޒީރުންގެ މަޖިލީހަށް މޫސާ ޒަމީރު އެންމެ ފުރަތަމަ ޢައްޔަންކުރެއްވީ ޚާރިޖީ ވަޒީރުގެ މަގާމަށެވެ. ނަމަވެސް، ފަހުން ސަރުކާރަށް ގެނައި ބަދަލުތަކާއެކު އޭނާ ވަނީ މާލީ ވަޒީރުގެ މަގާމަށް ބަދަލުކުރައްވާފައެވެ.
މާލީ ވަޒީރުގެ މަގާމުން ޒަމީރު އިސްތިއުފާ ދެއްވުމާ ގުޅިގެން، އެ މަގާމަށް ދެން އައްޔަން ކުރައްވާނެ ބޭފުޅަކާ ގުޅޭގޮތުން ސަރުކާރުން އަދި ރަސްމީ ބަހެއް ބުނެފައެއް ނުވެއެވެ.
