އީމާންކަމުގެ ރުކުންތަކުގެ ތެރެއިން ފުރަތަމަ ރުކުނާއި 5 ވަނަ ރުކުން ކަމުގައިވާ މާތް ﷲ އަށް އީމާންވުމާއި އާޚިރަތް ދުވަހަށް އީމާނެވެގެން ހުންނަ މީހާ އިސްލާމް ދީނުގެ މަގުން ކައްސައެއް ނުލާނެއެވެ. އޭނާ އަބަދުވެސް ހުންނާނީ އިސްލާމް ދީނުގެ މަގުގައި ފިސާރި ސާބިތުކަމާއިއެކުގައެވެ.
އެހެނީ މާތްﷲ އަށް ފުރިހަމައަށް އީމާންވެގެން ހުންނަ މީހާ އެކަލާނގެ އެއްކައުވަންތަކުރާނެއެވެ. ﷲ ތަޢާލާއަށް ޝަރީކެއް ނުކުރާނެއެވެ. ﷲ ތަޢާލާ ފިޔަވައި އެހެން އެއްވެސް ފަރާތަކަށް އަޅުކަމެއް ނުކުރާނެއެވެ.
ދެން މިދަންނަވަނީ ޢާޚީރަތް ދުވަހަށް އީމާންވުމުގެ ވާހަކައެވެ. ޢާޚިރަތް ދުވަހަށް އީމާންވެގެން ހުންނަ މީހާ އަބަދުވެސް ހުންނާނީ މަރުވެދާނެ ކަމަށް ބިރުންނެވެ. އެކަމަށް ތައްޔާރުވެގެންނެވެ. އެމީހާ ހުންނާނީ މަރުވުމުން ދެން ފެށޭ ހަޔާތަށް ތައްޔާރުވެގެންނެވެ.
މާތްﷲ އަށާއި އާޚިރަތް ދުވަހަށް އީމާންވެގެން ހުންނަ މީހާ އަބަދުވެސް ޤަބޫލުކޮށްގެން ހުންނާނީ އޭނާ ކުރާ ކޮންމެ ކަމެއްވެސް ﷲ ތަޢާލާ ބައްލަވައިވޮޑިގެންވާ ކަމަށެވެ. ބުނާ ކޮންމެ ބަހެއްވެސް އައްސަވައި ވޮޑިގެނަވާ ކަމަށެވެ. އެކަންކަމަށް ޙައްޤު ޖަޒާ ޤިޔާމަތް ދުވަހު ލިބޭނެ ކަމަށެވެ. އާޚިރަތް ދުވަހުގެ މީޒާނުގައި ތިމާގެ އަމަލުތައް ކިރޭނެ ކަމަށެވެ. ފުރިހަމައަށް އިންޞާފު ކުރެވޭނެ ކަމަށެވެ.
އޭނާ އަބަދުވެސް ހުންނާނީ ފާފަ ކުރެވޭނަމަ ސުވަރުގެ ނުދެވޭނެ ކަމާއި ކިތަންމެ ބޭނުން ނުވި ނަމަވެސް ހިލިހިލާ ޖަހާފައި އެއްލައިލެވޭނީ ނަރަކައިގެ ހޫނު އަލިފާން ގަނޑުގެ ތެރެއަށް ކަމަށް ޔަޤީންކޮށް އެކަމަށް ބިރުން ވިރިވިރިއެވެ. ވީމާ ﷲ ތައާލާ ޙަރާމް ކުރެއްވެވި އެއްވެސް ކަމެއް އެމީހާ ނުކުރާނެއެވެ. ހަމަ އެއާއިއެކު ސުވަރުގެ ދިއުމަށްޓަކައި ހެޔޮ އަމަލުތައް ކުރުން ގިނަކުރާނެއެވެ.
ފުރިހަމަ މުސްލިމަކަށް ވެވޭނީ އީމާންކަމުގެ 6 ރުކުން ޤަބޫލުކޮށް އީމާންވެގެންނެވެ. މިދަރުސްގައި މިކިޔައި ދިނީ ﷲ ތަޢަލާއަށް ފުރިހަމައަށް އީމާންވުމާއި ޢާޚިރަތް ދުވަހަށް އީމާންވުން ގުޅި ލާމެހިފައިވާ މިންވަރުން ހަމައެކަނި ސުރުޚީއެކެވެ.
- އިސްލާމީ ތިލަފަތުގެ ދަރުސަކުން
