ޞިއްޙީ ޚިދުމަތްތެރިން ވާޖިބު އަދާކުރުމުގައި އަބަދުވެސް ފަރުވާތެރިވެ، ޚިދުމަތުގެ ނާރެހަކީ އޯގާތެރިކަން ކަމުގައި ހެދުމަށް ޞިއްޙަތާއި އާއިލާއާއި އިޖުތިމާޢީ އެހީއާބެހޭ ވަޒީރު ޤީލާ އަލީ އިލްތިމާސްކުރައްވައިފިއެވެ. ވަޒީރު މިކަމަށް އިލްތިމާސްކުރެއްވީ ވިލާ ކޮލެޖުގެ ދަސްވެނިވުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ.
ރަސްމިއްޔާތުގައި ވާހަކަފުޅުދައްކަވަމުން ވަޒީރު ޤީލާ ޢަލީ ވިދާޅުވީ، މިއީ ހަމައެކަނި ތަޢުލީމާއި ތަމްރީނު ފުރިހަމަކުރުމުގެ ކާމިޔާބު ފާހަގަކުރުން ނޫން ކަމަށެވެ. އަދި މިއީ ޞިއްޙީ ޚިދުމަތަށް ތައްޔާރުވެފައިވާ މިންވަރާއި، ފަންނުވެރިކަމާއި، އަދުލުވެރި ޒިންމާދާރު ޚިދުމަތަކަށް އަދި މެދުކެނޑުމެއްނެތި ތަޢުލީމު ހާސިލުކުރުމަށް ދަރިވަރުންގެ ހުރި ޝައުޤުވެރިކަން ރަމްޒުކޮށްދޭ ރަސްމިއްޔާތެއް ކަމަށް ވެސް ވަޒީރު ފާހަގަކުރެއްވިއެވެ.
މީގެއިތުރުން، ދަރިވަރުން ހާސިލުކުރި ހުނަރުތަކުގެ ސަބަބުން މުޅި މުޖުތަމަޢުގެ ދުޅަހެޔޮކަމަށް ހެޔޮ އަސަރުތަކެއް ކުރާނެ ކަމަށް ވަޒީރު ވިދާޅުވިއެވެ.
ނަރުހުންގެ އަގުހުރި ދައުރަށް އަލިއަޅުއްވާލައްވަމުން ވަޒީރު އިތުރަށް ވިދާޅުވީ، ކޮންމެ ޞިއްޙީ ނިޒާމެއްގެ މައިބަދައަކީ ނަރުހުން ކަމަށާއި، ނަރުހުންގެ ޚިދުމަތަށް ނިކުންނަވާ ބޭފުޅުން ވަދެވަޑައިގަންނަވަނީ މިއަދު ދުނިޔޭގެ އެންމެ އިތުބާރު ކުރެވޭ ފަންނަށް ކަމަށެވެ.
