ދިރާގުގެ 38 ވަނަ އަހަރީ ދުވަހުގެ މުނާސަބަތާ ގުޅުވައިގެން ކަސްޓަމަރުންނަށް ޚާއްޞަ ގިނަ އޮފާތަކެއް އެ ކުންފުނިން މިއަދު ތަޢާރަފުކޮށްފިއެވެ. މީގެ ތެރޭގައި 24 ގަޑިއިރަށް ހިލޭ ލިބޭ 38 ޖީބީ ޑާޓާގެ އިތުރުން، އާޓިފިޝަލް އިންޓެލިޖެންސް (އޭއައި) ބޭނުންކޮށްގެން ކޯލްތައް މެނޭޖުކޮށްދޭ އައު ޓޫލެއް ހިމެނެއެވެ.
ދިރާގުން ބޭއްވި ނޫސްވެރިންގެ ބައްދަލުވުމުގައި އެ ކުންފުނީގެ މާކެޓިން އެންޑް ކޮމިއުނިކޭޝަންސް އެގްޒެކެޓިވް ސުހާ ޢަލީ ވިދާޅުވީ، އަހަރީ ދުވަހާ ގުޅިގެން ޕްރީޕެއިޑް އަދި ޕޯސްޓްޕެއިޑް ކަސްޓަމަރުންނަށް 38 ޖީބީ ޑާޓާގެ އޮފާ އެކްޓިވޭޓު ކުރެވޭނެ ކަމަށެވެ. މީގެ އިތުރުން ރާއްޖޭގައި އުޅޭ ބިދޭސީންނަށް ބޭރު ގައުމުތަކުގައި ތިބި އާއިލާތަކަށް ގުޅުމަށް 38 އައިޑީޑީ މިނެޓް ހިލޭ ލިބޭނެއެވެ. މި އޮފާ މެދުވެރިކޮށް އިންޑިއާ، ނޭޕާލް، ބަންގްލަދޭޝް، ޕާކިސްތާން އަދި އިންޑޮނޭޝިއާއަށް ގުޅާލެވޭނެއެވެ. މި އޮފާތައް މިއަދު އިރުއޮއްސި 18:00އާ ހަމައަށް ދިރާގު އެޕު މެދުވެރިކޮށް އެކްޓިވޭޓު ކުރެވޭނެ ކަމަށް ސުހާ ވިދާޅުވިއެވެ.
ބްރޯޑްބޭންޑް ޚިދުމަތްތަކަށް އަލިއަޅުއްވާލައްވަމުން ސުހާ ވިދާޅުވީ، 2021ގެ ކުރިން ހޯމް ބްރޯޑްބޭންޑް ރައުޓަރު ދޫކޮށްފައިވާ ކަސްޓަމަރުންނަށް، އިންޓަނެޓު އިތުރަށް އަވަސްކޮށްދޭ އެންމެ ފަހުގެ ރައުޓަރަށް މުޅިން ހިލޭ ބަދަލުކޮށްލެވޭނެ ކަމަށެވެ. މި މަހުގެ ނިޔަލަށް ކުރިއަށްދާ މި އޮފާވެސް ދިރާގު އެޕުން އެކްޓިވޭޓު ކުރެވޭނެއެވެ.
މިއާއެކު ދިރާގުން ވަނީ މޮބައިލް ކަސްޓަމަރުންގެ ކޯލްތައް މެނޭޖުކުރުމަށް 'އައިވް' (Ive) ނަމުގައި އޭއައި ޓޫލެއްވެސް ތަޢާރަފުކޮށްފައެވެ. މި ޓޫލް މެދުވެރިކޮށް ފޯނު ނުނެގޭ ހާލަތްތަކުގައި ފޯނު ނަގައި، ގުޅާ ފަރާތްތަކާ ވާހަކަދައްކައި ކޯލުގެ ޚުލާސާ ފޯރުކޮށްދިނުމުގެ އިތުރުން، ޑިޖިޓަލް ކަލަންޑަރުގައި މީޓިންތައް ޝެޑިއުލްކޮށްލެވޭނެއެވެ. މި ޓޫލް މި މަހު ހިލޭ ބޭނުންކުރެވޭނެ ކަމަށާއި، އެއަށްފަހު ބޭނުންކުރުމަށް އެޕު މެދުވެރިކޮށް ސަބްސްކްރައިބު ކުރަންޖެހޭނެ ކަމަށް ސުހާ ފާހަގަކުރެއްވިއެވެ.
އިތުރު އޮފާތަކާ ގުޅޭގޮތުން ދިރާގުގެ އެސިސްޓެންޓް މެނޭޖަރު މާކޮމްސް އެންޑް ޕީއާރް ޒީން މުހައްމަދު ވިދާޅުވީ، 'އެލީޓް ކުލަބު' މެދުވެރިކޮށް 38 ދުވަސް ވަންދެން ދިރާގު އެޕުން ޑިސްކައުންޓު ވައުޗާތަކެއް ލިބޭނެ ކަމަށެވެ. މީގެ ތެރޭގައި ޝޮޕިން، ތަރުކާރީ މޭވާ، އަދި މަޝްހޫރު ރެސްޓޯރަންޓުތަކަށް ޚާއްސަ ވައުޗާތައް ހިމެނެއެވެ.
އޭގެ ތެރޭގައި ޔެލޯފިން ޑައިން، ޗައިނާ ގާޑެން، އޭސް ހާޑްވެއާ، ފްލޯރާ އިން، ކޮފީ ބީން އެންޑް ޓީ ކެފޭ، މޫޗާ ގްރާސިއާސް، މެލްޓްޒް ކެލަމަލް، އީޒެޕް، އޯވީއެސް އަދި އައިލެންޑް އުފާ ދަރަވަންދޫ ހިމެނެއެވެ. އަދި ކުރިއަށް އޮތް ހޮނިހިރު ދުވަހު 'މޫ ކިޗަން'ގެ ވަކި އުފެއްދުންތަކަކުން 80 ޕަސެންޓާ ހަމައަށް ދިރާގު ކަސްޓަމަރުންނަށް ޑިސްކައުންޓު ލިބިގެންދާނެ ކަމަށްވެސް އެކުންފުނިން މައުލޫމާތުދެއެވެ.
