ކުރީގެ ޑިފެންސް މިނިސްޓަރު ކާނަލް (ރޓ) މުޙައްމަދު ނާޒިމް ފްރޭމްކޮށް ޖަލުގައި ބަންދުކޮށްގެން ރައީސް ޔާމީން ގެންގުޅުއްވި ސަބަބު ނާޒިމް މިރޭ ހާމަކުރައްވައިފިއެވެ.
ނާޒިމް މިރޭ ވިދާޅުވީ އެމަނިކުފާނު ހައްޔަރުކުރީ އެހެން އެޖެންޑާއެއް ގެންގުޅުއްވާ ކަމަށް ރައީސް ޔާމީނަށް ތުހުމަތު ކުރެއްވިގެން ކަމަށާއި އެގޮތަށް ތުހުމަތު ކުރެއްވުނީ މާލެއަށް ކުރިމަތިވި ފެނުގެ މައްސަލަ ހައްލުކުރައްވަން ކުރެއްވި ޤައުމީ މަސައްކަތުގެ ސަބަބުން ކަމަށެވެ. ނަމަވެސް އެގޮތަށް ރައީސް ޔާމީނަށް ހީފުޅުވި ނަމަވެސް އެއްވެސް އިތުރު އެޖެންޑާއެއް ގެންގުޅުއްވާފައި ނުވާނެ ކަމަށެވެ. "އަޅުގަނޑު މަސައްކަތްކުރީ ވަރަށް އިޚްލާޞްތެރިކަމާއެކު. އަޅުގަނޑަކީ ރައީސް ޔާމީނުގެ ސަރުކާރުގައި ވަރަށް ބުރަކޮށް މަސައްކަތް ކުރި މީހެއް. އެއްފަހަރާ އެންމެ ގިނަ ވުޒާރާ ހިންގި މީހަކަށްވާނެ އަޅުގަނޑު."
ނާޒިމް ވިދާޅުވީ އެމްޑަބްލިޔޫއެސްސީގެ ފެން ޕްލާންޓަށް 2014 ވަނަ އަހަރު ކުރިމަތިވި މައްސަލަ އާއި ގުޅިގެން މާލެއަށް ކުރިމަތިވި ފެނުގެ މައްސަލަ ކުރިމަތިވުމުން ކުރިމަތިލައްވާކަށް ރައީސް ޔާމީނަށް ކެރިވަޑައި ނުގެންނެވި ކަމަށެވެ. އެ މައްސަލަ ކުރިމަތިވިއިރު ރައީސް ޔާމީނު ހުންނެވީ ރާއްޖެއިން ބޭރުގައި ކަމަށެވެ. "އަޅުގަނޑު ރައީސް ޔާމީނަށް ގުޅާފަ ދެންނެވިން މާލޭގެ ކަންތައް މިއޮތީ ވަރަށް ނާޒުކު ޙާލަތެއްގައި ކަމަށާއި އަވަހަށް ރާއްޖެ ވަޑައިގެން ކުރިމަތިލެއްވުމަށް. ނަމަވެސް ވަޑައިގަންނަވާކަށް ކެރިވަޑައެއް ނުގެންނެވި. ވިދާޅުވި ނާޒިމް ކުރިއަށް ގެންދަވާށޭ."
ނާޒިމް ވިދާޅުވީ އެކަމުގައި ވަރަށް ބޮޑެތި ގޮންޖެހުންތަކާއި ކުރިމަތިލައްވަން ޖެހިވަޑައިގެންނެވި ކަމަށާއި އެހެންކަމުން އެ ގޮންޖެހުންތަކާއިއެކު ކުރިއަށް ވަޑައިގެންނެވިއިރު ވަރަށް ބޮޑެތި ދަތިތައް ރައީސް ޔާމީނު ކުރިމަތި ކުރެއްވި ކަމަށެވެ.
ނާޒިމް ވިދާޅުވީ ކުރިއަށް ދާން މަސައްކަތް ކުރުމުގެ ފުރުޞަތު އެންމެންނަށްވެސް އޮންނަން ޖެހޭނެ ކަމަށާއި އަދި ކުރިއަށް ދިއުމަށް މަސައްކަތް ކުރަންވެސް ޖެހޭނެ ކަމަށެވެ. "ނަމަވެސް ރައީސް ޔާމީނަށް އެފުރުޞަތު ލިބިވަޑައިގަތީ އެކަމަށް އެއްވެސް މަސައްކަތެއް ކުރައްވައިގެނެއް ނޫން. އަޅުގަނޑުމެން މަސައްކަތްކޮށްގެން ހޯދާފަ ތަބަކަކަށް ލައިފަ އެރުވި ފުރުޞަތެއް އެއީ. އެހެންވީމާ ރައީސް ޔާމީނަށް ހީފުޅުވީ ރައީސް ޔާމީނާ ޗެލެންޖުކުރާނެ މީހަކު އެބަ އަންނަ ކަމަށް. އެހެންވީމާ އަޅުގަނޑާ ދޭތެރޭ ކަންތައް ކުރެއްވީ ވަރަށް ގޯސްކޮށް."
މިރޭ ވެސް ނާޒިމް ވިދާޅުވީ އެމަނިކުފާނު ފްރޭމްކޮށް ބަންދުކޮށް ކަންކަން ކުރެވިގެން ދިއައީ ރައީސް ޔާމީނަށް ވަރަށް ރަނގަޅަށް އެނިގިވަޑައިގެން ކަމަށެވެ.
