3 އަހަރާ 9 މަސް ދުވަހު ޖަލުގައި ބަހައްޓާފައި އެކަމަށް ދެވޭނެ ބަދަލެއް ނޯންނާނެ ކަމަށާއި ލިބޭނެ ހަމައެކަނި ބަދަލަކީ އަނިޔާވެރިން އިންޞާފުގެ ކުރިމައްޗަށް ގެނައުން ކަމަށް ކުރީގެ ޑިފެންސް މިނިސްޓަރު ކާނަލް (ރޓ) މުޙައްމަދު ނާޒިމް ވިދާޅުވެއްޖެއެވެ.
ކާނަލް ނާޒިމް މިރޭ ވިދާޅުވީ އެމަނިކުފާނު ފްރޭމްކޮށް ބަންދުކުރުމުން އެކަމާއިމެދު އެންމެ ފުރަތަމަވެސް ކަންބޮޑުވެވަޑައިގަތީ އަދާލަތު ޕާޓީގެ ރައީސް ޝައިޚް އިމްރާން ކަމަށެވެ. "މިއަދު އެމަނިކުފާނު އެހުންނެވީ ހޯމް މިނިސްޓަރަކަށް. އަޅުގަނޑު އެދެނީ އަޅުގަނޑު ފްރޭމްކުރުމުގައި ބައިވެރިވި ފުލުހުން އަވަހަށް ހޯއްދަވައި ދެއްވައި އިންޞާފުގެ ކުރިމައްޗަށް ގެންގޮސް ދެއްވުން."
ނާޒިމް ވިދާޅުވީ އިންސާނެއްގެ ހަޔާތުގެ މިހައި ގިނަ ދުވަސްތައް ބޭއިންޞާފުން ޖަލުގައި ބޭއްވުމަށްފަހު އެކަމަށް ބަދަލު ދިނުމަކީ ފައިސާއިން ކުރެވޭނެ ކަމެއް ނޫން ކަމަށެވެ. "މިކަމަށް ސަރުކާރަށް ދެވޭނެ ހަމައެކަނި ބަދަލަކީ މިއަނިޔާދިން މީހުން އަވަހަށް އިންޞާފުގެ ކުރިމައްޗަށް ގެންގޮސް ޙައްޤު އަދަބު ދިނުން. އަޅުގަނޑުގެ ޢާއިލާ ކުރި ހިތާމަތަކަށް ކޮން ބަދަލެއްތޯ ދެވޭނީ؟"
ނާޒިމް ވިދާޅުވީ މިއީ މީހަކު ފްރޭމްކޮށް އަނިޔާ ދިނުމަށް ރާއްޖޭގައި ހިންގި އެންމެ ބޮޑު ޖަރީމާ ކަމަށާއި މިވަރުގެ ބޮޑު ކަމެއް ކުރި ބައަކު ހޯދައި މައްސަލަ ނުބަލައި ތިބެން ހެޔޮ ނުވާނެ ކަމަށެވެ. "ރާއްޖޭގަ ދެން ދިމާވާނީ މިއަށްވުރެ ބޮޑެތި ކަންތައް. ފުލުހުންގެ ތެރެއިން މަދު ބައަކު ހިންގި ވަރަށް ބޮޑު ޖަރީމާއެއް މިއީ. ކަނޑައެޅިގެން މީހެއްގެ ގެއަށް ފިސްތޯލައެއްލައި ފްރޭމްކޮށް 3 އަހަރާ 9 މަސް ދުވަހު ޖަލުގައި ބޭއްވުމަކީ ކޮންފަދަ ބޮޑު ޖަރީމާއެއްތޯ؟ އެހެންނޫނީ އެކަން ވެގެންދާނީ ފުލުހުންގެތެރޭގައި ތިބޭ ބައަކަށް މިފަދަ ކަމެއް ކުރަން ލިބޭ ވަރަށް ބޮޑު އިތުރު ފުރުޞަތަކަށް. އަޅުގަނޑަށް ޤަބޫލުކުރަނީ އަޅުގަނޑަށް ދިން ހުރިހާ އަނިޔާތަކެއްގެ އެންމެ އަޑީގައި ހުންނެވީ ރައީސް ޔާމީނު ކަމަށް އަޅުގަނޑު ޤަބޫލުކުރަނީ."
ނާޒިމް ވިދާޅުވީ އޭނާއަކީ އެއްވެސް ކުށެއް ކުރެއްވި ބޭފުޅެއް ކަމަށް އެއްވެސް ރައްޔިތަކު ޤަބޫލު ނުކުރާނެ ކަމަށެވެ. "ޑިފެންސް މިނިސްޓަރަކަށް ހުންނަ މީހަކު ސޮއިކުރީމާ ހަތިޔާރު އެދުވަހަކު ދާންޖެހޭ ތަނަކަށް އެދަނީ. ވީމާ ކީއްކުރަންތޯ އަޅުގަނޑުގެ ގޭގައި ފިސްތޯލައަކާ 3 ވަޒަން ގޭގައި ބާއްވަންވީ؟ އަޅުގަނޑަކީ ސިފައިންގެ ޚިދުމަތުގައި ހޭދަކުރި 52 އަހަރުގެ ދިގު މުއްދަތުގައި ފިސްތޯލަ ޖަހައި އުޅުނު މީހެއް. އަޅުގަނޑުގެ ގޭގައި ހުރި ތަޅުނުލާ ވަތްގަނޑެއްގައި ފިސްތޯލައެއް ބާވަފާނެކަމަށް ޤަބޫލުކުރާނެ މީހަކު ދުނިޔެއަކު ނުހުންނާނެ. އެހެން ނަމަވެސް ރައީސް ޔާމީނަށް އެކަންވެސް ޤަބޫލުފުޅު ކުރެއްވިއްޖެ. އަޅުގަނޑުގެ ގޭގައި ފިސްތޯލައަކާ 3 ވަޒަނާ ޕެންޑްރައިވްއެއް ބާއްވައިގެން ޖަރީމާއެއް ހިންގަން އުޅޭ ކަމަށް. އަޅުގަނޑަށް ހީވަނީ ޔާމީނު ހުންނެވީ ހަމަ ބުއްދީގައިވެސް ނޫން ކަމަށް."
ނާޒިމް ވިދާޅުވީ ރާއްޖޭގެ ރައްޔިތުން ރައީސް ޔާމީނަށް ނޫނެކެވެ ބުނީ ރައީސް ޔާމީނު ހުންނެވީ ހަމަ ބުއްދީގައި ނޫންކަން ޤަބޫލުފުޅު ކުރެއްވިގެން ކަމަށާއި ރާއްޖޭގެ ސިޔާސީ މަޝްރަހުން ރައީސް ޔާމީން ފޮހެލެވެން ޖެހޭނެ ކަމަށް ޤަބޫލުފުޅު ކުރައްވާ ކަމަށެވެ.
